63
10 ივლისი 2024, 16:09
ჩეხეთის სტრატეგიული ობიექტები გასულ წელს ოთხჯერ გახდა ჰაკერული თავდასხმის მსხვერპლი. ინფორმაციას ამის შესახებ Euractiv-ი ჩეხეთის კიბერ და საინფორმაციო უსაფრთხოების ეროვნული სააგენტოს მიერ მომზადებულ დასკვნაზე დაყრდნობით ავრცელებს.
დასკვნის თანახმად, რომელზეც ჩეხეთის მთავრობამ უნდა იმსჯელოს, შარშან კიბერ სივრცეში ინციდენტების რაოდენობამ რეკორდულ მაჩვენებელს მიაღწია, თუმცა სერიოზული ჰაკერული თავდასხმების რაოდენობა შემცირებულია.
„გასულმა წელმა რუსეთის ფედერაციასთან და ჩინეთის სახალხო რესპუბლიკასთან დაკავშირებული სუბიექტების ჩეხეთის სტრატეგიული ობიექტების მიმართ არსებული ინტერესი დაადასტურა“, - ციტირებს Euractiv-ი ჩეხეთის კიბერ და საინფორმაციო უსაფრთხოების ეროვნული სააგენტოს დირექტორს ლუკაშ კინტრს.
დასკვნაში აგრეთვე ნათქვამია, რომ რუსი და ჩინელი ჰაკერები კონფიდენციალური სამთავრობო ინფორმაციის მოპოვებას ცდილობდნენ. უსაფრთხოებიდან გამომდინარე დოკუმენტში არ არის დაკონკრეტებული, თუ რომელი დაწესებულებები გახდნენ კიბერთავდასხმის მსხვერპლი.
დოკუმენტში ასევე აღნიშნულია, რომ კიბერშეტევებში ჩრდილოკორეული ჰაკერული დაჯგუფება Lazarus-იც მონაწილეობდა, რომელსაც ნატოსა და ევროკავშირის სამხედრო სამრეწველო კომპანიების კომპრომეტირება სურს.
გასულ წელს ირანთან დაკავშირებული ჰაკერები, რომლებიც ჩეხეთის მიერ ისრაელის მხარდაჭერას ეწინააღმდეგებიან, აგრეთვე მოქმედებდნენ ქვეყანაში და მათი სამიზნე წყლის რესურსების მართვის სისტემები იყო.
| სარეკლამო ადგილი - 11 650 x 60 |
