საქართველოში გამართული მსოფლიო ტურიზმის დღის ღონისძიების ერთ-ერთი სპიკერი უზბეკეთის ტურიზმის, ეკოლოგიის, გარემოს დაცვისა და კლიმატის ცვლილების მინისტრი აზიზ აბდუხაკიმოვი საქართველოს ტურისტულ პოტენციალზე საუბრობს.
„მსოფლიოს სხვადასხვა ქვეყნის ტურიზმის მინისტრები შევიკრიბეთ ულამაზეს ქალაქ თბილისში. მინდა მადლობა გადავუხადო საქართველოს მთავრობასა და მსოფლიო ტურიზმის ორგანიზაციას მასპინძლობისთვის. განვიხილეთ სხვადასხვა მნიშვნელოვანი საკითხი, რომელიც ეხება ლოჯისტიკას, უსაფრთხოებას, რა თქმა უნდა მთავარი პუნქტი იყო ტურიზმი და მშვიდობა. ვიმსჯელეთ ჩვენს სამომავლო კავშირზე, ვიზის ახალ სტანდარტზე, რაც ხელს შეუწყობს ტურიზმი გახდეს უფრო ხელმისაწვდომი. საქართველო გამოირჩევა ულამაზესი არქიტექტურით, მდიდარი ისტორიით, კულტურული მემკვიდრეობითა და სამზარეულოთი, თუ ჩვენ ამ ყველა კომპონენტს გავაერთიანებთ, შემიძლია თამამად ვთქვა, რომ საქართველო ერთ-ერთი ყველაზე მიმზიდველი ტურისტული დანიშნულების ადგილია მსოფლიოში“, - განაცხადა აზიზ აბდუხაკიმოვმა.
გაეროს ტურიზმის ორგანიზაციის ეგიდით, მსოფლიო ტურიზმის დღის აღსანიშნავი ღონისძიება საქართველოში პირველად გაიმართა. მსოფლიო ტურიზმის დღის ფარგლებში საქართველოს ეწვივნენ მსოფლიოს მრავალი ქვეყნიდან მაღალი რანგის სტუმრები, ტურიზმის მინისტრები, დეპარტამენტების ხელმძღვანელები და ტურიზმის სფეროს პროფესიონალები, ჯამურად 300-ზე მეტი დელეგატი.
ინფორმაციას ტურიზმის ეროვნული ადმინისტრაცია ავრცელებს.
| სარეკლამო ადგილი - 11 650 x 60 |
