პრეზიდენტის როლი უბრალოდ შეუძლებელია, რომ არ დააფასო, – ამის შესახებ „კოალიცია ცვლილებების“ ლიდერმა, ნიკა გვარამიამ საქართველოს პრეზიდენტთან, სალომე ზურაბიშვილთან ოპოზიციის შეხვედრის შემდეგ ჟურნალისტებს განუცხადა.

როგორც გვარამიამ აღნიშნა, რაც შეხვედრაზე მოისმინა, იყო ძალიან კონსტრუქციული, სწორი და დროული.

„უბრალოდ შეუძლებელია, პრეზიდენტის როლი არ დააფასო, გამომდინარე პოლიტიკური წონიდან, მაგრამ, რაც მთავარია, სამართლებრივი და საერთაშორისო პოლიტიკის თვალსაზრისით. პრეზიდენტი არის ერთადერთი ლეგიტიმური ორგანო, რომელსაც შეუძლია, ისაუბროს საქართველოს სახელით. ასეა დღეის მდგომარეობით. ამის გამო ვწუხვარ, მაგრამ ეს მოცემულობაა. რაც დღეს მოვისმინეთ იყო ძალიან კონსტრუქციული, სწორი და დროული. ვისაუბრეთ იმაზე, როგორ შეიძლება, პროდასავლური პოლიტიკური პარტიები იღებდნენ მონაწილეობას ცალკეულ გადაწყვეტილებებში თუ განცხადებებში ან რა გაცვლა-გამოცვლა უნდა გვქონდეს ინფორმაციის და არამხოლოდ. მნიშვნელოვანია, რომ საზოგადოების წევრებიც იყვნენ ამაში ჩართულნი. ამასთან დაკავშირებით პრეზიდენტს აქვს  მოსაზრებები, ამას თვითონ განაცხადებს“, – განაცხადა გვარამიამ.