მიხეილ სააკაშვილის მიერ საზღვრის უკანონო გადმოკვეთის საქმეზე ბრალდებულები მოსამართლემ სასამართლო დარბაზიდან გათავისუფლა
სარეკლამო ადგილი - 10
650 x 60
180 20 იანვარი 2022, 11:58
მიხეილ სააკაშვილის საქართველოში შემოსვლის საქმეზე ბრალდებული 4 პირი - გიორგი ნარიმანიძე, ელგუჯა ცომაია, ზურაბ და შალვა წოწორიები 5000-5000-ლარიანი გირაოს სანაცვლოდ გათავისუფლდნენ.

აღნიშნული გადაწყვეტილება თბილისის საქალაქო სასამართლოს მოსამართლემ გიორგი კერატიშვილმა მიიღო. დაკავებულები სხდომათა დარბაზიდან გათავისუფლდნენ. მათ გირაოს გადახდის ვადა 1 თვის ვადით განესაზღვრათ.

დღევანდელ სხდომაზე დაცვის მხარემ ბრალდებულებთან შეთანხმებით, პროკურატურის მიერ წარდგენილი ყველა მტკიცებულება უდაოდ ცნო. აღნიშნულის შემდეგ, ადვოკატებმა დაკავებულების გირაოს 5000-5000-ლარიანი სანაცვლოდ გათავისუფლების შუამდგომლობა დააყენეს.

როგორც დაცვის მხარე განმარტავდა, იქიდან გამომდინარე, რომ ბრალდებულებმა დანაშაული აღიარეს, ასევე პროკურატურის მიერ წარმოდგენილი ყველა მტკიცებულება უდაოდ ცნეს, დაკავებულებს ყველაზე მკაცრი აღკვეთის ღონისძიება პატიმრობა გირაოთი უნდა შეცვლოდა.

აღნიშნულ შუამდგომლობას ბრალდების მხარე დაეთანხმა და განმარტა, რომ ისინი დაკავებულების მიმართ ნაკლებად მკაცრი აღკვეთის ღონისძიების გამოყენების წინააღმდეგი არ არიან, ვინაიდან ისინი ბრალს აღიარებენ, ამასთან, მტკიცებულებებს უდაოდ ცნობენ.

ცნობისთვის, გამოძიება საქართველოს სისხლის სამართლის კოდექსის 375-ე მუხლის მეორე ნაწილით, 344-ე პრიმა მუხლის მე-3 ნაწილის "ა" ქვეპუნქტით და 344-ე მუხლის პირველი ნაწილით მიმდინარეობს.

ბრალდებულებს გიორგი ნარიმანიძეს, ელგუჯა ცომაიას, შალვა და ზურაბ წოწორიებს მძიმე დანაშაულის დაფარვას ედავებიან. რაც შეეხება ელგუჯა ცომაიას, მას ასევე ბრალი წარდგენილი აქვს საზღვრის უკანონო გადმოკვეთაში დახმარებისთვის.

ერთ-ერთი ბრალდებულის, ელგუჯა ცომაიას განცხადებით, სასამართლოს მიერ დღეს მიღებული გადაწყვეტილების შესახებ მოგვიანებით ისაუბრებს.

ჟურნალისტების კითხვაზე, ელოდებოდა, თუ არა დღეს ის სხდომის დარბაზიდანვე გათავისუფლებას, ცომაიამ პასუხი არ გასცა და აღნიშნა, რომ ნერვიულობს.

„ვნერვიულობ, არაფერს გეტყვით, მაცალეთ. იქნება ამის დრო“, - განაცხადა ელგუჯა ცომაიამ.


სარეკლამო ადგილი - 11
650 x 60
არქივი