არესტოვიჩის განცხადებაში ვერაფერს განსაკუთრებულს ვერ ვხედავ, მისთვის მკაფიოდ არის ასახსნელი რომ ჩვენ არ ვაპირებთ ომით დავიბრუნოთ ოკუპირებული ტერიტორიები, რაც არ უნდა ამის შესაძლებლობა გვქონდეს, - ამის შესახებ „გირჩის“ წევრმა, ჰერმან საბომ „ქრონიკას“ განუცხადა.
„ამ სიტუაციიდან კარგი გამოსავალი იქნებოდა, რომ ჩვენი ხელისუფლება, არა მარტო საპარლამენტო დონეზე, არამედ აღმასრულებელ დონეზეც აქტიური კომუნიკაცია ჰქონდეს უკრაინის ხელისუფლებასთან“, - განაცხადა ჰერმან საბომ.
უკრაინის პრეზიდენტის ადმინისტრაციის უფროსის მრჩევლის, ალექსეი არესტოვიჩის განცხადებით, საქართველოს ხელისუფლება არ გამოიყურება ისე, რომ ახლა ცხინვალში შესვლა შეეძლოთ.
უკრაინის პრეზიდენტის ადმინისტრაციის უფროსის მრჩეველი ალექსეი არესტოვიჩი გამოეხმაურა ოკუპირებული ცხინვალის რეგიონის ე.წ. ხელისუფლების მიერ 17 ივლისისთვის დანიშნულ „რეფერენდუმს“ რუსეთთან შეერთების საკითხზე.
„მე კარგად არ ვიცი საქართველოს შეიარაღებული ძალების მდგომარეობა. ვერ ვიტყვი, შეუძლიათ თუ არა მათ ცხინვალში შესვლა, არის თუ არა ჯარი ახლა შესაბამის მდგომარეობაში, მაგრამ მე კარგად ვიცი საქართველოს ხელისუფლების მდგომარეობა. ისინი არ გამოიყურებიან ისე, რომ ეს შეეძლოთ. შეიძლება, შეუძლიათ, მაგრამ მე ასე არ მგონია, რადგან ქვეყნის ხელისუფლება არ შეიძლება შედიოდეს კამათში ორ შტატგარეშე მრჩეველთან - ჩემთან და პოდოლიაკთან. ეს ხდება პრემიერ-მინისტრისა და მმართველი პარტიის ლიდერის დონეზე და ასე შემდეგ. როგორც წესი, ეს მაშინ ხდება, როდესაც ძალიან ზუსტად მოარტყამ მტკივნეულ ადგილზე. თუმცა, ქართველი ხალხი იკითხავს, „ბიჭებო, როგორაა ზოგადად ტერიტორიული მთლიანობის საკითხი, როდესაც ჩვენი კუთვნილება მიაქვთ ახლა უკვე არა მხოლოდ დე ფაქტო, არამედ უკვე დე იურე“, – განაცხადა არესტოვიჩმა.
| სარეკლამო ადგილი - 11 650 x 60 |
