ევროპის საგარეო ქმედებათა სამსახური (EEAS) ჟოზეფ ბორელსა და ირაკლი ღარიბაშვილს შორის გამართულ შეხვედრაზე განცხადებას ავრცელებს.
„შეხვედრის დროს ჟოზეფ ბორელმა ხაზი გაუსვა ევროკავშირის მხარდაჭერას საქართველოს მედეგობის გასაძლიერებლად უკრაინაში რუსეთის არაპროვოცირებული და გაუმართლებელი შეჭრის კონტექსტში. მან ასევე დაადასტურა ევროკავშირის მტკიცე ერთგულება საქართველოს ტერიტორიული მთლიანობისა და სუვერენიტეტისადმი მის საერთაშორისოდ აღიარებულ საზღვრებში“, - ნათქვამია განცხადებაში.
ბორელმა ხაზი გაუსვა ევროკავშირის მტკიცე განწყობას კიდევ უფრო გააღრმავოს ურთიერთობები საქართველოსთან, რათა ქვეყანა კიდევ უფრო დაუახლოვდეს ევროკავშირს.
„ამ კონტექსტში, მან ხაზი გაუსვა პარტიათაშორისი თანამშრომლობისა და შიდა პოლიტიკურ ძალებს შორის ერთიანობის მნიშვნელობას, რაც არის საკვანძო საქართველოში დემოკრატიის გასაძლიერებლად მნიშვნელოვანი რეფორმების პრიორიტეტებში კონკრეტული და სწრაფი პროგრესის მისაღწევად. ევროკავშირი მზად არის, საქართველოს გვერდით იყოს ამ ძალისხმევებში; კერძოდ, შიდა პოლიტიკური პოლარიზაციის დაძლევაში; სასამართლო რეფორმის ინკლუზიური და სანდო დღის წესრიგის გზაზე დადგომაში და ამ მხრივ, შეთანხმებული საკონსტიტუციო რეფორმების განხორციელებაში. ეს კიდევ უფრო მნიშვნელოვანია საქართველოს მიერ ევროკავშირში გაწევრიანებაზე განაცხადის წარდგენის გათვალისწინებით. საქართველო ევროპულ ოჯახს მიეკუთვნება“, - აღნიშნულია განცხადებაში.
სარეკლამო ადგილი - 11 650 x 60 |