უკრაინის პრეზიდენტმა ვოლოდიმირ ზელენსკიმ ჩრდილოატლანტიკური ალიანსის სამიტზე შეკრებილებს სიტყვით მიმართა.

„რუსეთი იზოლირებული უნდა იყოს. ის არ უნდა იყოს იმ საერთაშორისო სტრუქტურებში, რომელთა განადგურებაც პუტინს სურს. რუსეთთან არ უნდა არსებობდეს დიალოგი, ვიდრე თავად არ დაიწყებს დიალოგის ძიებას. არის თუ არა შემთხვევითი, რომ ყველა მოკავშირე აღმოსავლეთში, ყველა ჩვენი მეზობელი მხარს უჭერს უკრაინის ნატოში გაწევრიანებას? არა, ეს არ არის დამთხვევა. ეს არის ლოგიკა. ეს ჩვენი რეგიონის ცხოვრების გათვითცნობიერებაა“, - აღნიშნა ვოლოდიმირ ზელენსკიმ.