177
25 სექტემბერი 2022, 09:23
ტყვედ ჩაბარებულ რუს ჯარისკაცებს ვოლოდიმირ ზელენსკი უსაფრთხოების გარანტიებს აძლევს. უკრაინის პრეზიდენტმა ტყვეების დაცვაზე მას შემდეგ ისაუბრა, რაც ერთი დღით ადრე ვლადიმირ პუტინის ინიციატივით რუსეთის სისხლის სამართლის კოდექსში ტყვეების შესახებ ახალი ჩანაწერი გაჩნდა. ამიერიდან, ტყვედ ნებაყოფლობით ჩაბარება დასჯადი ხდება და ის სამიდან 10 წლამდე თავისუფლების აღკვეთას ითვალისწინებს. თუკი არ იკვეთება სახელმწიფოს ღალატის ნიშნები.
კოდექსის გამაცრებას, გამოეხმაურა უკრაინის პრეზიდენტი და ტყვედ ნებაყოფლობით ჩაბარების შემთხვევაში, რუს ჯარისკაცებს სამ პირობას აძლევს:
“უკრაინა თითოეულ რუს ჯარისკაცს, რომელიც ტყვედ ჩაბარდება, სამი რამის გარანტიას აძლევს: რომ თქვენ ცივილიზებულად მოგეპყრობიან, ყველა კონვენციის შესაბამისად; არავინ არ გაიგებს თქვენი ტყვედ ჩავარდნის გარემოებებს, რუსეთში არავინ გაიგებს, რომ თქვენი ტყვედ ჩავარდნა ნებაყოფლობითი იყო; თუ რუსეთში დაბრუნების შეგეშინდებათ და თავად არ ისურვებთ გაცვლას, ჩვენ ვიპოვით ამის უზრუნველყოფის გზებსაც”, - განაცხადა ზელენსკიმ.
ზელენსკის შეფასებით, რუს მეთაურებს მოქალაქეების სიცოცხლე არ აინტერესებთ.
“უკრაინულ ტყვეობაში ჩაბარება უკეთესია, ვიდრე ჩვენი იარაღის დარტყმების ქვეშ სიკვდილი, ჩვენი სრულიად სამართლიანი დარტყმების ქვეშ, ვინაიდან უკრაინა ამ ომში თავს იცავს”, - აღნიშნა პრეზიდენტმა.
| სარეკლამო ადგილი - 11 650 x 60 |
