764
11 იანვარი 2020, 22:08
ლოზანაში, ზამთრის ახალგაზრდული ოლიმპიური თამაშების პირველ საშეჯიბრო დღეს საქართველოს გუნდიდან სარბიელზე პირველი გავიდა ფიგურულ ციგურაობაში ალინა ბუტაევასა და ლუკა ბერულავას წყვილი და წარმატებითაც.
ჩვენმა მოციგურავეებმა მოკლე პროგრამაში 59.14 ქულა დაიმსახურეს, რაც 8 წყვილს შორის მესამე საუკეთესო შედეგია. პირველი და მეორე საფეხურები რუსებს უკავიათ, შესაბამისად - 71.74 და 60.45 ქულით.
აღსანიშნავია, ქართული წყვილი უახლოეს მდევრებს - ამერიკელ და კანადელ მეტოქეებს თითქმის 10 ქულას უგებს. ეს იმას ნიშნავს, რომ 12 იანვარს, თავისუფალ პროგრამაში კარგად გამოსვლის შემთხვევაში, ალინა ბუტაევასა და ლუკა ბერულავას ოლიმპიური თამაშების პრიზიორთა შორის მოხვედრის რეალური შანსი აქვთ.
დღეს კი, ერთეულთა შორის მოკლე პროგრამაში, რომელშიც 16 საუკეთესო მოციგურავე გოგონა მონაწილეობდა, საქართველოს სახელით მოასპარეზე 16 წლის ალინა ურუშაძემ მე-5 ადგილი დაიკავა. პრიზიორთა ვინაობა 13 იანვარს თავისუფალი პროგრამით გამოსვლის შემდეგ გაირკვევა.
| სარეკლამო ადგილი - 11 650 x 60 |
