საარჩევნო უბნების დახურვის შემდეგ საერთაშორისო დამკვირვებლებმა შეფასებები გააკეთეს. მათი უმეტესობა აცხადებს, რომ საქართველოში არჩევნები ყველა შესაბამის კრიტერიუმს აკმაყოფილებდა, დაცული იყო ევროპული დემოკრატიული ღირებულებები და ყველაფერი წესების შესაბამისად ჩატარდა.
არჩევნებს 24700 ქართველი და საერთაშორისო დამკვირვებელი აკვირდებოდა.
„არჩევნები და კენჭისყრის პროცესი მშვიდობიანად და პრობლემების გარეშე ჩატარდა, ადგილობრივადაც ყველა პროცედურა დაცული იყო“, - განაცხადა საერთაშორისო დამკვირვებელმა ბეატა ტროხანოვსკამ.
„დღეს ვიხილეთ ძალიან თავისუფალი და სამართლიანი არჩევნები. ამომრჩეველს არანაირი დაბრკოლება არ ჰქონია, არც ძალადობის ინციდენტები ყოფილა. პროცესი პროფესიონალურად ჩატარდა და დაკმაყოფილდა ყველა რელევანტური რეგულაციის კრიტერიუმი“, - აღნიშნავს საერთაშორისო დამკვირვებელი ფანი ლაჩკო.
„ჩემი დაკვირვებით, საარჩევნო პროცესი გამჭვირვალე იყო. მნიშვნელოვანია, რომ არჩევნებს მრავალი საერთაშორისო დამკვირვებელი აკვირდებოდა. ეს არჩევნებს სძენს სანდოობასა და გამჭვირვალობას, რაც ევროკავშირისთვის მნიშვნელოვანია“, - თქვა კანდელა სოლ სივამ.
„ეს იყო არამხოლოდ ძალიან მშვიდობიანი პროცესი, არამედ ძალიან მოწესრიგებული თავისუფალი და სამართლიანი“, - აცხადებს კიდევ ერთი საერთაშორისო დამკვირვებელი ხორხე გონსალეზ გალარცა.
| სარეკლამო ადგილი - 11 650 x 60 |
