წმინდა პეტრეს მოედანზე შეკრებილ ხალხს ახალმა პაპმა ლეო XIV-მ პირველი სიტყვებით მიმართა: „მშვიდობა იყოს თქვენთან“.

„ეს არის აღმდგარი ქრისტეს პირველი მისალმება, კეთილი მწყემსისა, რომელმაც თავისი სიცოცხლე ღმერთს შესწირა“, - განაცხადა მან და ახსნა თავისი მისალმების არჩევანი.

„და მე ასევე მსურს, რომ ეს მშვიდობის მისალმება შევიდეს ჩვენს გულებში და ჩვენს ოჯახებში“, - დასძინა მან.

პაპმა ლეო XIV-მ პატივი მიაგო გარდაცვლილ პაპ ფრანცისკეს და მოუწოდა შეკრებილებს, მუდამ ახსოვდეთ ის.

„დავიმახსოვროთ პაპ ფრანცისკეს სუსტი ხმა, რომელიც აღდგომის დილას რომს ლოცავდა, პაპი, რომელმაც რომი დალოცა, მთელი მსოფლიო დალოცა აღდგომის დილას. ნება მომეცით, გავაგრძელო ეს კურთხევა. ღმერთს ვუყვარვართ. ღმერთს უყვარს ყველა. ბოროტება ვერ გაიმარჯვებს“, – განაცხადა პაპმა ლეო XIV-მ იტალიურად.

პაპმა იტალიურ და ესპანურ ენებზე მადლობა გადაუხადა კარდინალებს, რომლებმაც ის ორდღიანი კონკლავის დროს აირჩიეს.

„ასევე, მსურს, მადლობა გადავუხადო ჩემს ძმებს, კარდინალებს, რომლებმაც ამირჩიეს მემკვიდრედ. ყოველთვის ვეძებოთ მშვიდობა და სამართლიანობა“, – განაცხადა პაპმა ლეო XIV-მ.