პალესტინური ექსტრემისტული მოძრაობა „ჰამასი“ აცხადებს, რომ ამერიკელი მძევალი ედან ალექსანდერი გაათავისუფლა. როგორც დაჯგუფებაში აცხადებენ, ისინი მზად არიან მოლაპარაკებებში ჩასართავად ცეცხლის შეწყვეტის ყოვლისმომცველი და მდგრადი შეთანხმების მისაღწევად.
„ჰამასის“ წარმომადგენლების თქმით, მძევლის გათავისუფლება ამერიკულ მხარესთან მნიშვნელოვანი მოლაპარაკებების შედეგად მოხდა.
ამასთან, წითელმა ჯვარმა დაადასტურა, რომ ედან ალექსანდერი გადასცეს.
21 წლის ედან ალექსანდერი აშშ-ის და ისრაელის მოქალაქეა. ის თელ-ავივშია დაბადებული, თუმცა ნიუ-ჯერსიში გაიზარდა. ალექსანდერი ღაზის სექტორის საზღვარზე ელიტურ სამხედრო დანაყოფში მსახურობდა, როდესაც 7 ოქტომბრის თავდასხმის დროს „ჰამასის“ მებრძოლებმა მძევლად აიყვანეს.
7 ოქტომბერს მძევლად აყვანილი 251 პირიდან, „ჰამასის“ ტყვეობაში ამ დრომდე რჩება 58 ადამიანი, ასევე მანამდე დაკავებული კიდევ ერთი მძევალი. მათგან ცოცხალი სავარაუდოდ 24 ადამიანია.
| სარეკლამო ადგილი - 11 650 x 60 |
