არ მივიჩნევ, რომ ეს შეფასება შეიძლება არსებობდეს საქართველოს ხელისუფლებასთან დაკავშირებით, არ მივიჩნევ, რომ რაიმე საფუძველია ამგვარი შეფასების არსებობისთვის. ჩვენ სისტემურად ძალიან კარგი თანამშრომლობა გვქონდა და გვაქვს აშშ-თან, როდესაც სისტემურ თანამშრომლობაზეა საუბარი და არ არსებობს არანაირი საფუძველი, ამ თანამშრომლობას კითხვის ნიშნები დაუსვან, – ასე გამოეხმაურა საქართველოს საგარეო საქმეთა მინისტრი მაკა ბოჭორიშვილი აშშ-ის სახელმწიფო მდივნის, მარკო რუბიოს სენატში გაკეთებულ განცხადებას, სადაც სახელმწიფო მდივანს საქართველოზე კითხვა დაუსვეს.
როგორც საქართველოს საგარეო უწყების ხელმძღვანელმა „რუსთავი 2“-ის ეთერში აღნიშნა, „როგორც ჩანს, აშშ-ის ადმინისტრაციას საქართველოსთან მიმართებით ჯერ ჩამოყალიბებული პოზიცია არ აქვს“.
„გარდა ამისა, 30 წლის განმავლობაში საქართველო არის ის ქვეყანა, რომელიც ამ რეგიონში არის ამერიკის შეერთებული შტატებისთვის სანდო პარტნიორი და ეს არ არის მხოლოდ მაკა ბოჭორიშვილის სიტყვები – ეს არის 30 წლიანი თანამშრომლობით დადასტურებული ფაქტი, რომ საქართველო აშშ-ისთვის ამ რეგიონში არის სანდო პარტნიორი.
საქართველოს ხელისუფლების მიერ არაერთხელ გაკეთებულა განცხადება და გამოხატულა წუხილი იმ ურთიერთობის უკუსვლასთან დაკავშირებით, რაც აშშ-ის წინა ადმინისტრაციის პირობებში ხდებოდა. ჩვენ არაერთხელ გამოგვიხატავს მზაობა და იმედი, რომ ახალი ადმინისტრაციის პირობებში მოხდება თვისებრივად შეცვლა ამ ურთიერთობების და ამ ურთიერთობების საქართველოს და აშშ-ის ეროვნული ინტერესების შესაბამისად წარმართვა.
ჩვენ რასაც ვხედავთ და რაც დღეს მოვისმინეთ, არის ის, რომ ეს არის საკითხი, რომელიც აშშ-ის სახელმწიფო მდივნის მიერ არის განხილვის პროცესში – ანუ პოზიციაზე, რომელიც უნდა ჰქონდეს აშშ-ს საკუთარი ეროვნული ინტერესებიდან გამომდინარე ჩვენს რეგიონში. მსჯელობენ და ამ საკითხზე პასუხის გასაცემად დღეს სახელმწიფო მდივანი მზად არ იყო და თქვა კიდეც, რომ მას დღეს პასუხი არ ექნებოდა, თუ როგორი შეიძლება იყოს აშშ-ის პოლიტიკა”, – განაცხადა მაკა ბოჭორიშვილმა.
| სარეკლამო ადგილი - 11 650 x 60 |
