აშშ-ის დედაქალაქ ვაშინგტონში სროლის შედეგად ამერიკაში ისრაელის საელჩოს ორი თანამშრომელი მოკლეს. ინფორმაციას Reuters-ი ავრცელებს.

სააგენტოს ცნობით, მოკლულები ქალი და მამაკაცი არიან. მათ უცნობებმა ცეცხლსასროლი იარაღიდან ცეცხლი გაუხსნეს. აღსანიშნავია, რომ მკვლელობის ადგილთან ახლოს გამოძიების ფედერალური ბიუროს (FBI) და პროკურატურის განყოფილებები მდებარეობს.

ვაშინგტონის პოლიციის უფროსის, პამელა სმიტის განცხადებით, ერთ-ერთი სავარაუდო ბოროტმოქმედი დაკავებულია. დაკავებისას ის ყვიროდა „თავისუფლება პალესტინას, თავისუფლება პალესტინას“.

მომხდარი დაადასტურა აშშ-ში ისრაელის საელჩოს წარმომადგენელმა, ტალ ჰაიმ კოენმა. მისი თქმით, საელჩოს ორი თანამშრომელი იმ დროს მოკლეს, როცა ისინი მუზეუმში ერთ-ერთ ღონისძიებას ესწრებოდნენ.

შემთხვევის ადგილი უკვე დაათვალიერეს აშშ-ის გენერალურმა პროკურორმა, პემ ბონდიმ და კოლუმბიის ოლქის პროკურორმა, ჯენინ პირომ. მომხდარს გამოეხმაურნენ FBI-ის დირექტორი, კეშ პატელი და შიდა უსაფრთხოების მდივანი, კრისტი ნოემი.