უკრაინის პრეზიდენტი ვოლოდიმირ ზელენსკი პარტნიორებს მოუწოდებს, გაზარდონ ინვესტიციები უკრაინისთვის საჭირო იარაღის წარმოებაში, უშუალოდ მის ქვეყანაში. ამის შესახებ ზელენსკიმ „რამშტაინის“ შეხვედრაზე ვიდეომიმართვისას განაცხადა.
მისი თქმით, უკრაინას უკვე აქვს იარაღის საკუთარ ტერიტორიაზე წარმოებასთან დაკავშირებით გარკვეული პროექტები პარტნიორების მხარდაჭერით.
„ჩვენთვის აუცილებელია ამის მასშტაბირება, სულ მცირე, 50%-ით. უკრაინის თავდაცვით-სამრეწველო კომპლექსს ჯერ კიდევ აქვს აუმოქმედებელი სიმძლავრე – საჭიროა მხოლოდ ფინანსირება. ჩვენ მხოლოდ 17 მილიარდი დოლარი გვაქვს იარაღის შესაძენად ჩვენს ეროვნულ ბიუჯეტში, 35 მილიარდი დოლარის პოტენციალის მქონე ინდუსტრიისთვის. დაფინანსებისთვის 18 მილიარდი დოლარის დანაკლისს განვიცდით“, – განაცხადა ზელენსკიმ.
ამასთან, უკრაინის პრეზიდენტის განცხადებით, იმედი აქვს, „რამშტაინის“ სხდომის დასასრულს, კონკრეტული შეთანხმებები გამოჩნდება.
„რამშტაინის“ სხდომა პირველად იმართება აშშ-ის თავდაცვის მინისტრის მონაწილეობის გარეშე. პიტ ჰაგსეტი ასევე არ დაესწრება უკრაინა-ნატოს საბჭოს სხდომას.
| სარეკლამო ადგილი - 11 650 x 60 |
