36
19 ივნისი 2025, 15:19
საქართველოს პროფესიული კავშირების გაერთიანების ორგანიზებითა და შრომის საერთაშორისო ორგანიზაციის (ILO) მხარდაჭერით, 18-19 ივნისს ბათუმში გაიმართა ორდღიანი კონფერენცია თემაზე: „დასაქმებულთა მომავლის ფორმირება”:
ღონისძიება განხორციელდა ACTRAV-ის (შრომის საერთაშორისო ორგანიზაციის მშრომელთა აქტივობების ბიურო) ჩართულობით და მიზნად ისახავდა პროფესიული კავშირების როლის გაძლიერებას და მათ საერთაშორისო პრაქტიკებთან დაახლოებას.
კონფერენციის ფარგლებში განხილულ იქნა ისეთი მნიშვნელოვანი საკითხები, როგორიცაა:
პროფესიული კავშირების ისტორია და სამომავლო სტრატეგიები,
ILO-ს საქართველოში განხორციელებული პროგრამები (DWCP),
კლიმატური ცვლილებებისა და სამართლიანი გადასვლის პროცესი,
NDC-ების (ეროვნული დონეზე განსაზღვრული წვლილი) როლი და პროფკავშირების ჩართულობა,
სოციალური დიალოგის განვითარება და პარტნიორობა სახელმწიფო უწყებებსა და სამოქალაქო საზოგადოებასთან
სამართლიანი გადასვლა საქართველოში: არსებული პრაქტიკა და საჭირო ინიციატივები
მონაწილეებმა იმსჯელეს პროფესიული კავშირების გამოწვევებზე, მათ როლზე სწრაფად ცვალებად სოციალურ და ეკონომიკურ გარემოში. სპეციალური სესია დაეთმო ახალგაზრდების როლს პროფკავშირულ მოძრაობაში და თემას — „რა გვინდა დავინახოთ მომავლის პროფკავშირებში“.
ტრენინგში მონაწილეობა მიიღეს საქართველოს სხვადასხვა დარგობრივი პროფკავშირის წარმომადგენლებმა, ასევე ACTRAV-ის ექსპერტებმა და ILO-ს ადგილობრივმა და საერთაშორისო წარმომადგენლებმა.
ღონისძიება დასრულდა ჯგუფური მუშაობით, დასკვნებისა და რეკომენდაციების შეჯამებით, რომლებიც სამომავლო პოლიტიკის ფორმირებასა და სამოქმედო გეგმების შემუშავებას დაეფუძნება.
| სარეკლამო ადგილი - 11 650 x 60 |
