35
05 ივლისი 2025, 18:01
თურქეთის პრეზიდენტმა, რეჯეფ თაიფ ერდოღანმა იმედი გამოთქვა, რომ ბოლოდროინდელი „სამწუხარო მოვლენები“ რუსეთსა და აზერბაიჯანს შორის ურთიერთობებს გამოუსწორებელ ზიანს არ მიაყენებს.
ამის შესახებ თურქეთის ლიდერმა ჟურნალისტებს აზერბაიჯანიდან დაბრუნებისას განუცხადა, სადაც ეკონომიკური თანამშრომლობის ორგანიზაციის სამიტში მონაწილეობდა.
„თურქეთს ღრმა დიპლომატიური და სტრატეგიული ურთიერთობები აქვს როგორც აზერბაიჯანთან, ასევე რუსეთთან. ჩვენ ყურადღებით ვაკვირდებით დაძაბულობას და თავშეკავებისკენ მოვუწოდებთ. ჩვენი უდიდესი სურვილია, რომ მომხდარმა სამწუხარო მოვლენებმა რუსეთსა და აზერბაიჯანს შორის ურთიერთობებს გამოუსწორებელი ზიანი არ მიაყენოს“, - განაცხადა თურქეთის ლიდერმა.
აზერბაიჯანსა და რუსეთს შორის ურთიერთობები გაუარესდა მას შემდეგ, რაც 27 ივნისს ეკატერინბურგში 50-ზე მეტი აზერბაიჯანული წარმოშობის ადამიანი დააკავეს. ორი მათგანი დაიღუპა, კიდევ ორი მძიმედ დაშავდა რეიდის დროს. ბაქომ მოითხოვა დამნაშავეების დასჯა.
| სარეკლამო ადგილი - 11 650 x 60 |
