აშშ-ის იუსტიციის სამინისტრომ 20-ზე მეტი თანამშრომელი გაათავისუფლა, რომლებიც დონალდ ტრამპის მიმართ წარმოებულ საქმეებზე მუშაობდნენ. ამის შესახებ „სიბიეს ნიუსი“ ანონიმურ წყაროებზე დაყრდნობით წერს. მათ შორის არიან პროკურორები, იურისტების ასისტენტები და სხვა პერსონალი, რომლებიც მუშაობდნენ ტრამპის მიერ საიდუმლო დოკუმენტების უკანონო შენახვისა და 2020 წლის არჩევნების შედეგების გაყალბების მცდელობების გამოძიებაზე. ორივე ამ საქმეს ყოფილი სპეციალური პროკურორი ჯეკ სმიტი ხელმძღვანელობდა.

აშშ-ის იუსტიციის სამინისტრომ ჯამში 35-ზე მეტი ადამიანი გაათავისუფლა და როგორც „სიბიეს ნიუსი“ წერს, მოსალოდნელია, რომ კიდევ 15 ადამიანს გაათავისუფლებენ.

ამასთან, გათავისუფლებულთა შორის არის სამი პროკურორი, რომლებიც 2021 წლის 6 იანვრის კაპიტოლიუმის შტურმის საქმეზე მუშაობდნენ და გამოძიების ფედერალური ბიუროს თანამშრომელი, პეტი გარტმანი, რომელიც ამ გამოძიებებში საზოგადოებრივ კავშირებს კოორდინირებდა. გარტმანმა „სიბიეს ნიუსს“ განუცხადა, რომ უწყებაში რეპრესიების ტალღა გაგრძელდება.

„წესები აღარ არსებობს. ადრე არსებობდა საზღვარი, იყო მკაფიო გამიჯვნა თეთრ სახლსა და იუსტიციის სამინისტროს შორის, რადგან ერთი მხარე არ უნდა ერეოდეს მეორის მუშაობაში. ეს საზღვარი სამუდამოდ გაქრა“,-განაცხადა გარტმანმა.