თბილისის მერის, კახა კალაძის განცხადებით, ამ დროის მონაცემებით, სადგურის მოედნის მიმდებარე ტერიტორიაზე მომხდარი უბედური შემთხვევის შედეგად დაიღუპა ერთი ადამიანი.
მისივე თქმით, ერთი ადამიანი არის დაშავებული, რომელსაც კლინიკაში შესაბამისი მკურნალობა უტარდება.
კახა კალაძე ამბობს, რომ კორპუსი ავარიული იყო, თუმცა ჩანაცვლების პროგრამაში მონაწილეობისთვის მოსახლეობაში სრული თანხმობა არ იყო მიღწეული.
„კორპუსს რაც შეეხება, იყო ავარიული, მეხუთე კატეგორიის ავარიულობა ჰქონდა მინიჭებული, რომელიც არ ექვემდებარებოდა რეაბილიტაციას. ეს იცოდა ადგილობრივმა მოსახლეობამ, არაერთი შეხვედრა იყო გამართული დიდუბის რაიონის გამგეობაში, რომელიც არის დაოქმებული. შეთავაზება იყო გაკეთებული, რომ მონაწილეობა მიეღოთ ჩანაცვლების პროგრამაში, რითაც ჩვენ უზრუნველყოფდით აღნიშნული კორპუსის დემონტაჟს და ახალი კორპუსის სამშენებლო სამუშაოებს. ამ პროგრამის განხორციელებას სჭირდება მოსახლეობის 100-პროცენტიანი თანხმობა, რომელიც სამწუხაროდ, ჯერ ვერ იქნა მიღწეული. რამდენიმე ოჯახი, რომელმაც თანხმობა განაცხადა, გაყვანილია ქირით, თუმცა დანარჩენებმა, ამ ეტაპზე განაცხადეს უარი. ეს არის რეალური მდგომარეობა“, – აღნიშნა კახა კალაძემ.
| სარეკლამო ადგილი - 11 650 x 60 |
