ევროპელმა ლიდერებმა დაგმეს სიდნეიში მომხდარი თავდასხმა, რომლის შედეგადაც, თერთმეტი ადამიანი დაიღუპა. დიდი ბრიტანეთის პრემიერ-მინისტრმა, კირ სტარმერმა მომხდარი ტერორისტულ თავდასხმად შეაფასა.
„გაერთიანებული სამეფო ყოველთვის ავსტრალიისა და ებრაული თემის გვერდით იდგება“, – წერს სტარმერი სოციალურ ქსელში.
ევროკომისიის პრეზიდენტმა, ურსულა ფონ დერ ლაიენმა თანაგრძნობა გამოხატა მსხვერპლთა ოჯახების მიმართ.
„ევროპა ავსტრალიისა და ებრაული თემების გვერდით დგას მთელ მსოფლიოში. ჩვენ გაერთიანებული ვართ ძალადობის, ანტისემიტიზმისა და სიძულვილის წინააღმდეგ“, – აღნიშნავს ფონ დერ ლაიენი.
ამასთან, გერმანიის კანცლერის, ფრიდრიხ მერცის შეფასებით, ეს არის თავდასხმა საერთო ღირებულებებზე.
„ანტისემიტიზმი უნდა აღვკვეთოთ აქ, გერმანიასა და მთელ მსოფლიოში“, – წერს ფრიდრიხ მერცი.
საფრანგეთის პრეზიდენტმა, ემანუელ მაკრონმა აღნიშნა, რომ საფრანგეთი თანაგრძნობას უცხადებს დაჭრილებსა და დაღუპულთა ახლობლებს.
„ჩვენ ვიზიარებთ ავსტრალიელი ხალხის ტკივილს და განვაგრძობთ ბრძოლას ანტისემიტიზმის წინააღმდეგ, რომელიც ყველას აზიანებს“, – აღნიშნავს ემანუელ მაკრონი.
ცნობისთვის, სიდნეიში, სანაპიროზე სროლის შედეგად თერთმეტი ადამიანი, მათ შორის ერთ-ერთი თავდამსხმელი დაიღუპა, არიან დაშავებულები. პოლიციის ცნობით, ინციდენტის დროს სანაპიროზე ხანუკას დღესასწაულს აღნიშნავდნენ. სროლის შედეგად, სულ მცირე, 29 ადამიანი დაშავდა, აქედან ორი პოლიციელია.
| სარეკლამო ადგილი - 11 650 x 60 |
