გახსოვთ, როგორი შემართებით და გრძნობით მოგვიწოდებდნენ, რომ ეს იყო უკან გადადგმული ნაბიჯი, ეს იყო საშინელება, რასაც ჩაიდენდა საკანონმდებლო ხელისუფლება საკუთარი ხალხის წინააღმდეგ, სინამდვილეში „ხალხის ძალის“ მხრიდან გადადგმული ეს ნაბიჯი იყო 5 წლით ადრე გათვლილი სწორი სვლა, რომელშიც ვიღებდი მონაწილეობას და მეამაყება, - განაცხადა გადაცემაში „EURO ანატომია“„ხალხის ძალის“ დეპუტატმა ზურაბ ქადაგიძემ ევროსაბჭოს მიერ გამჭვირვალობის კანონის კრიტიკაზე საუბრისას.
მისივე თქმით, „ხალხის ძალამ“ ყინულმჭრელის როლი შეასრულა გამჭვირვალობის კანონის პირველი ვერსიის დაიინიცირებაში.
„ჩვენ მივაღწიეთ იმას, რომ ხელისუფლება და სამთავრობო გუნდიც დავარწმუნეთ, რომ ეს იყო უალტერნატივო გზა, ეგზისტენციალური საკითხი და დღეს მივედით იქამდე, რომ ის ადამიანები, რომლებიც პირდაპირ გვიკიჟინებდნენ, რომ ჩვენ ავტოკრატიისკენ მივდიოდით, თურმე გამოცდილების გაზიარებას გვთხოვენ.
ჩვენ შეგვიძლია ერთი გამოცდილება გავუზიაროთ მათ, რომ თუ არ უნდათ იმ აბსურდსა და იმ ბნელ ოთახში აღმოჩნდნენ, სადაც აღმოჩნდნენ, ყველა პარტნიორს უნდა ესაუბრონ თანაბარუფლებიანობის პრინციპიდან გამომდინარე. ეს არის რეალური ევროპული ღირებულება და არა ის ფსევდო ღირებულებები, როდესაც მასწავლებლის პოზიციიდან გვესაუბრებოდნენ, როგორც მოსწავლეს. ისინი უნდა დაეშვნენ, რეალობის აღქმა დაიბრუნონ და არ გაუჭირდებათ ჩვენი გამოცდილების გაზიარება“, - აღნიშნა ზურაბ ქადაგიძემ.
| სარეკლამო ადგილი - 11 650 x 60 |
