გაფართოების საკითხებში ევროკომისარმა, მარტა კოსმა სომხეთის საზოგადოებრივ რადიოსთან ინტერვიუში რეგიონული განვითარების პერსპექტივებსა და ევროკავშირის სტრატეგიაზე - Global Gateway-ზე ისაუბრა. კოსის განცხადებით, სამხრეთ კავკასია საკვანძო როლს ასრულებს ევროპისა და ცენტრალური აზიის დაკავშირებაში.

კითხვაზე - რაც შეეხება ბოლოდროინდელ რეგიონულ მოვლენებს, საჭიროებენ თუ არა ისინი სამხრეთ კავკასიაში „გლობალური კარიბჭის“ (Global Gateway) სტრატეგიის გადაფასებას ან კორექტირებას? - ევროკომისარმა უპასუხა:

მოხარული ვარ, რომ ახსენეთ „გლობალური კარიბჭე“. ეს არის პროგრამა, რომელიც ჩვენ ევროპაში მრავალი სხვადასხვა მიმართულებით შევიმუშავეთ და ერთ-ერთი მათგანი მჭიდროდ არის დაკავშირებული ე.წ. „დაკავშირებადობის დღის წესრიგთან“. ამ დღის წესრიგს, ან შეგვიძლია ვისაუბროთ „შავი ზღვის სტრატეგიაზე“, რომელიც ევროკავშირში მივიღეთ, ერთი მთავარი მიზანი აქვს: როგორ დავაკავშიროთ ცენტრალური აზია და ევროპა ერთმანეთთან ბევრად უკეთ? მოგეხსენებათ, სომხეთსა და აზერბაიჯანს შორის მშვიდობის არარსებობისა თუ ომის გამო, ამ ტერიტორიის გავლით ეს შეუძლებელი იყო, თუმცა ახლა ეს შესაძლებელია და ეს ამ გზაზე მდებარე ყველა ქვეყნის დიდ ინტერესში შედის.

ევროკომისარმა ასევე ხაზი გაუსვა რუსულ გაზზე დამოკიდებულების შემცირების აუცილებლობას.

„და რა თქმა უნდა, თქვენ ახსენეთ დივერსიფიკაცია. ვფიქრობ, ზოგიერთი ქვეყნისთვის ეს უაღრესად მნიშვნელოვანია. მაგალითად, ახლა ხედავთ, რომ ევროპას სურს იყოს ენერგოდამოუკიდებელი, რაც იმას ნიშნავს, რომ ადრე, მაგალითად, გაზის 60%-ზე მეტის იმპორტს რუსეთიდან ვახდენდით. ეს უზარმაზარი დამოკიდებულებაა. შესაბამისად, დივერსიფიკაცია ასევე ნიშნავს იმას, რომ ჩვენ უფრო ფრთხილად ვზრუნავთ საკუთარ ინტერესებზე. ეს გულისხმობს შემდეგს: თუ ჩვენ აღარ შეგვიძლია ან, ვთქვათ, აღარ გვსურს გაზის მიღება რუსეთიდან, სად შეგვიძლია მისი მოპოვება? სამხრეთ კავკასიაზე გამავალი დაკავშირებადობის დღის წესრიგი კი სწორედ ამის შესაძლებლობას მოგვცემს“, - დასძინა მან.