აშშ-ის პრეზიდენტმა, დონალდ ტრამპმა ოვალურ კაბინეტში ჟურნალისტებთან საუბრისას განაცხადა, რომ ირანთან მოლაპარაკებები აქტიურ ფაზაშია და თეირანი მნიშვნელოვან დათმობებზე მიდის.
ტრამპის თქმით, ირანული მხარე ვაშინგტონთან კონტაქტზეა და ამჯერად ისინი „გონივრულად საუბრობენ“. პრეზიდენტმა დაადასტურა, რომ ირანი დათანხმდა პირობას, რომლის მიხედვითაც მათ არასდროს ექნებათ ბირთვული იარაღი.
მოლაპარაკებების პროცესში ჩართულნი არიან ადმინისტრაციის მაღალჩინოსნები: სტივ უიტკოფი და ჯარედ კუშნერი, მარკო რუბიო და ჯეი დი ვენსი.
„მეორე მხარეს, შემიძლია გითხრათ, რომ შეთანხმების მიღწევა სურთ. მათ ადგილას ვინ არ ისურვებდა ამას?“ - განაცხადა ტრამპმა.
პრეზიდენტმა ხაზი გაუსვა ირანის დასუსტებულ თავდაცვისუნარიანობას და აღნიშნა, რომ ქვეყნის სამხედრო ინფრასტრუქტურა პრაქტიკულად განადგურებულია. ტრამპის თქმით, ირანს აღარ ჰყავს მოქმედი ფლოტი, სამხედრო-საჰაერო ძალები და მწყობრიდანაა გამოსული მათი კავშირგაბმულობისა თუ ანტისარაკეტო სისტემები.
„ჩვენ თავისუფლად გადავაადგილდებით თეირანის თავზე. შეგვიძლია ვაკეთოთ ის, რაც მოგვესურვება“, - დასძინა აშშ-ის პრეზიდენტმა.
| სარეკლამო ადგილი - 11 650 x 60 |
