ქართველიშვილი ბოკერიაზე: გაუგებარია, როგორ გადაურჩა მანიაკალური რეჟიმის ერთ-ერთი მთავარი იდეოლოგი პასუხისმგებლობას - მისგან ბიძინა ივანიშვილის დადანაშაულება სახელმწიფოებრიობის ეჭვის ქვეშ დაყენებაში, უკვე ცინიზმიც აღარ არის

გავა დრო და ექვთიმე თაყაიშვილის, ივანე ჯავახიშვილის, რეზო ლაღიძის საქართველოში დაიბადება გიგა ბოკერია - მენგელეს, გრეზეს და გიოტეს იდეური შთამომავალი. მხოლოდ ერთი სისხლიანი ეპიზოდის გახსენებაც საკმარისია, რომლის ერთ-ერთ სცენარის ავტორად გიგა ბოკერია გვევლინება - მოდელირებული ე.წ. "ციხის ბუნტის" დამხობა, 2006 წლის 27 მარტის იმ "ციხის ბუნტისა", რომელსაც გუშინწინ 20 წელიწადი შეუსრულდა, - წერს დავით ქართველიშვილი. „ხალხის ძალის“ წევრი ასე ბიძინა ივანიშვილის შესახებ „ფედერალისტების“ ლიდერის, გიგა ბოკერიას განცხადებას ეხმიანება.

როგორც ქართველიშვილი აღნიშნავს, გაუგებარია, როგორ გადაურჩა მანიაკალური რეჟიმის ერთ-ერთი მთავარი იდეოლოგი - ერისა და მართლმსაჯულების წინაშე პასუხისმგებლობას.

„ბახის, ბეთჰოვენის, ვაგნერის, დიურერის, რიხტერის გერმანიაში დაიბადნენ სისხლისმსმელი ჯალათები: იოზეფ მენგელე, ირმა გრეზე და ამონ გიოტე - რომლებიც მანიაკალურ სიამოვნებას იღებდნენ ფაშისტურ საკონცენტრაციო ბანაკებში უმწეო პატიმრებზე სადისტური ექსპერიმენტებით.

გავა დრო და ექვთიმე თაყაიშვილის, ივანე ჯავახიშვილის, რეზო ლაღიძის საქართველოში დაიბადება გიგა ბოკერია - მენგელეს, გრეზეს და გიოტეს იდეური შთამომავალი. მხოლოდ ერთი სისხლიანი ეპიზოდის გახსენებაც საკმარისია, რომლის ერთ-ერთ სცენარის ავტორად გიგა ბოკერია გვევლინება - მოდელირებული ე.წ. "ციხის ბუნტის" დამხობა, 2006 წლის 27 მარტის იმ "ციხის ბუნტისა", რომელსაც გუშინწინ 20 წელიწადი შეუსრულდა.

მაშინ უბრალოდ "ვიღაცის" ავადმყოფურ თავში დაიბადა ამ სისხლიანი დრამის გათამაშების სცენარი - რა დროსაც ნაცების საკონცენტრაციო ბანაკის უდანაშაულო და უმწეო ბინადრები დახოცეს, დაჭრეს და დაასახიჩრეს. ჩემთვის დღემდე გაუგებარია, როგორ და რანაირად გადაურჩა მანიაკალური რეჟიმის ეს ერთ-ერთი მთავარი იდეოლოგი - ერისა და მართლმსაჯულების წინაშე პასუხისმგებლობას. მაგრამ - სისხლიანი "ციხის ბუნტის" მეოცე წლისთავზე, მისი ერთ-ერთი მონაწილის პირიდან ბიძინა ივანიშვილის დადანაშაულება საქართველოს სახელმწიფოებრიობის ეჭვის ქვეშ დაყენებაში, ეს უკვე ცინიზმიც კი აღარ არის...“ - წერს ქართველიშვილი.

გიგა ბოკერიამ, „რადიო თავისუფლებასთან“ ინტერვიუში განაცხადა, რომ „ბიძინა ივანიშვილმა არსებითად ეჭვის ქვეშ დააყენა ჩვენი ერის სახელმწიფოდ არსებობის საკითხი“.