552
24 ნოემბერი 2019, 15:41
მიუხედავად წარუმატებელი პრეზენტაციისა, კომპანია "ტესლამ " ელექტროპიკაპ Cybertruck-ზე ორ დღეში 146 ათასი შეკვეთა მიიღო. ამის შესახებ Twitter-ზე კომპანიის ხელმძღვანელი ილონ მასკი წერს. მისივე თქმით, კლიენტების 42 პროცენტს ორძრავიანი, 41 პროცენტს - სამძრავიანი, 17 პროცენტს კი, ერთძრავია კომპლექტაციის შეძენა სურს.
"ტესლამ" ახალი ელექტროავტომობილი Tesla Cybertruck 22 ნოემბერს წარადგინა. ილონ მასკის განცხადებით, ავტომობილის დიზაინის შთაგონების წყარო ჯეიმს ბონდის ერთ-ერთი ფილმი გახდა. ექვსადგილიანი მანქანის კორპუსი გამძლე, უჟანგავი ფოლადისგანაა შექმნილი, მინები კი დაჯავშნილია.
მიუხედავად ამისა, ავტომობილის პრეზენტაციაზე გვერდითა ორი მინა მაინც გაიბზარა, როდესაც კომპანიის წამყვანმა დიზაინერმა მანქანას ფოლადის ბურთი ესროლა, რათა ჯავშანმინის საიმედოობა დაედასტურებინა. თუმცა, მასკი არ გაბრაზებულა და მხიარულად განაცხადა, რომ „არის რაღაც, რაზეც უნდა წაიმუშაონ“.
"მარსის ავტომობილის" სახელით ცნობილი მოდელის წარმოებას "ტესლა" 2021 წლიდან დაიწყებს. პიკაპის ღირებულება 40-დან 70 ათას დოლარია. Cybertruck-ი იმავე მასალისგან არის აწყობილი, რომელსაც კომპანია SpaceX-ის რაკეტების შესაქმნელად იყენებს.
| სარეკლამო ადგილი - 11 650 x 60 |
