გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე თბილისის მერიის მიერ ორგანიზებულ ადგილობრივი ეკონომიკური განვითარების მე-13 ფორუმს დაესწრო.

ფორუმზე სახელწოდებით - „მდგრადი განვითარება - მწვანე, ჭკვიანი, ბიზნეს-მეგობრული“, კომიტეტის თავმჯდომარემ მდგრადი ურბანული განვითარებისა და მდგრადი სატრანსპორტო მობილობის მნიშვნელობაზე ისაუბრა. მან თავის გამოსვლაში, ხაზი გაუსვა ადგილობრივ დონეზე მწვანე და ცირკულარული ეკონომიკის განვითარების აუცილებლობას.

მაია ბითაძემ მოწვეულ სტუმრებს კომიტეტის საქმიანობის შესახებ მიაწოდა ინფორმაცია და ისაუბრა განხორციელებული და დაგეგმილი აქტივობების შესახებ, ასევე კანონპროექტებზე, რომლებზეც კომიტეტი ხსენებული მიმართულებებით მუშაობს; მათ შორის, სტუმრებს მიაწოდა ინფორმაცია ისეთი მნიშვნელოვანი კანონპროექტის შესახებ, როგორიცაა საქართველოს კლიმატის ცვლილების შესახებ კანონის პროექტი.

როგორც კომიტეტის თავმჯდომარემ აღნიშნა, სიცოცხლისუნარიანი, მდგრადი, ინკლუზიური ურბანული პროექტების განხორციელება, ბიზნეს - მეგობრული გარემოს ჩამოყალიბების ხელშეწყობა სახელმწიფოს ერთ-ერთი მთავარი პრიორიტეტია.

ფორუმს ესწრებოდნენ საქართველოს პარლამენტის წევრები, სხვადასხვა სახელმწიფო უწყების და ადგილობრივი თვითმმართველობების წარმომადგენლები, დიპლომატები, საერთაშორისო ორგანიზაციების წარმომადგენლები, საგანმანათლებლო დაწესებულების წარმომადგენლები და სტუდენტები.

ღონისძიება ევროკავშირის და გაეროს განვითარების პროგრამის (EU-UNDP M4EG), მიგრაციის საერთაშორისო ორგანიზაციის (IOM), დანიისა და შვეიცარიის საელჩოების ასევე კომპანიების: „დუგლაძეების ღვინის კომპანია“, „ქალაქური“, „სარაჯიშვილი“ მხარდაჭერით გაიმართა.