ამბულატორიები და პოლიკლინიკები, სადაც 13 000 ზე ნაკლები ბენეფიციარი ჰყავთ, დღეიდან სახელმწიფო პროგრამაში მონაწილეობას ვეღარ მიიღებენ. 

ჯანდაცვის სამინისტროს პირველადი ჯანდაცვის საკოორდინაციო საბჭოს გადაწყვეტილებით, ჯამში ასეთი, 56 სამედიცინო დაწესებულებაა.

სახელმწიფო დაფინანსება შეუწყდა იმ დაწესებულებებს, სადაც ემსახურებოდნენ მოსახლეობის მცირე რაოდენობას -200, 300, 1000 ან 1500 ადამიანს. ჯამურად 56 დაწესებულებაზე მიბმული იყო 90 ათასი ადამიანი. ამ დაწესებულებებით მოსარგებლე პირები სხვა, გეოგრაფიულად მათთვის ხელმისაწვდომ სამედიცინო დაწესებულებებში გადანაწილდებიან.

გამონაკლისი დაიშვება დაბებთან მიმართებით, სადაც 7 ათასი და მეტი მოსახლე ცხოვრობს. მათ სახელმწიფო დაფინანსება შეუნარჩუნდებათ. სამინისტროში განმარტავენ რომ სიახლე ეფექტიანობისა და ხარისხის გაუმჯობესებას, ასევე პირველადი ჯანდაცვის ქსელში სელექტიური კონტრაქტის ამოქმედებას ემსახურება. 

„მიმდინარე წლის იანვარში მიღებულ იქნა მთვრობის დადგენილება, რომელიც მიზნად ისახავდა თბილისში, ქუთაისსა და ბათუმში პირველადი ჯანდაცვის ქსელში სელექტიური კონტრაქტის ამოქმედებას საყოველთაო ხელმისაწვდომობის პროგრამის ფარგლებში. დღეს იყო მსჯელობა იმასთან დაკავშირებით, თუ რომელი დაწესებულებები უნდა დარჩეს სერვისის მიმწოდებლად პროგრამაში იმ კრიტერიუმების გათვალისწინებით, რასაც ითვალისწინებდა ეს დადგენილება. აქ საქმე შეეხება მიმაგრებული მოსახლეობის რაოდენობას. ოპტიმალური რაოდენობა განისაზღვრა 13 ათასი და მეტი მოსახლე, ასევე მონაწილეობა პრევენციულ სერვისებში, ადამიანური რესურსის განათლების პროგრამებში მონაწილეობა. ეს კრიტერიუმები დაწესებულებების ნაწილმა დააკმაყოფილა. სულ 117 დაწესებულება არის თბილისის ფარგლებში, ასევე 20-მდე დაწესებულება ბათუმის და ქუთაისის ფარგლებში. გარდა იმისა, რომ მოსახლეობის რაოდენობა მნიშვნელოვანია, ასევე ვიმსჯელეთ გეოგრაფიული ხელმისაწვდომობაც მოსალხლეობისთვის, თუ რომელი დარჩეს. აქ საქმე შეეხება დაბების მოსახლეობას. მაგალითად, დაბა წყნეთი, ფონიჭალა, ლილოს დასახლება, სადაც 13 ათასი მოსახლე არ არის, მაგრამ მნიშვნელოვანია რომ იქ ჯანდაცვის ხელმისაწვდომობისთვის დაწესებულება დარჩეს. ასევე ვისმჯელეთ იმ დაწესებულებებზე, სადაც მოსახლების რაოდენობა არის 7 ათასზე ზემოთ, ანუ ზღვარი არის 7-დან 13 ათასამდე", - განაცხადა ჯანდაცვის მინისტრის მოადგილე თამარ გაბუნიამ.