„კოალიცია ცვლილებისთვის“ ლიდერი ნიკა გვარამია რუსთავის ციხესთან დააკავეს. რუსთავის ციხესთან ის მოსამართლის მიერ მისი დაპატიმრების თაობაზე გადაწყვეტილების გამოცხადების შემდეგ მივიდა.
სამართალდამცველთა ინფორმაციით, გვარამია გარკვეული პროცედურების გასავლელად ჯერ რუსთავის პოლიციის სამმართველოში გადაიყვანეს, რის შემდეგაც რუსთავის სასჯელაღსრულების დაწესებულებაში დააბრუნებენ.
„გარკვეული პროცედურების გატარების მიზნით გადაიყვანენ პოლიციის დაწესებულებაში, რუსთავის სამმართველოში და შემდეგ დააბრუნებენ რუსთავის პენიტენციურ დაწესებულებაში. შეასახლებენ მე-12 დაწესებულებაში“, – განაცხადა ერთ-ერთმა სამართალდამცველმა.
დღეს თბილისის საქალაქო სასამართლოში ნიკა გვარამიას პროცესი გაიმართა. მოსამართლის, ჯვებე ნაჭყებიას გადაწყვეტილებით, ნიკა გვარამიას აღკვეთის ღონისძიება გირაო პატიმრობით შეეცვალა. აღკვეთის ღონისძიების შეცვლის მიზეზი გირაოს გადაუხდელობა გახდა.
ნიკა გვარამია სასამართლო დარბაზში არ ყოფილა. პროცესის დაწყებამდე მან განაცხადა, რომ თავად მივიდოდა რუსთავში არსებულ პენიტენციურ დაწესებულებასთან.
ნიკა გვარამიას პარლამენტის დროებით საგამოძიებო კომისიაზე გამოუცხადებლობის გამო აღკვეთის ღონისძიების სახით 30 000-ლარიანი გირაო ჰქონდა შეფარდებული. ნიკა გვარამია აცხადებდა, რომ გირაოს არ გადაიხდიდა. გირაოს გადახდის ვადა 7 ივნისს ამოიწურა.
| სარეკლამო ადგილი - 11 650 x 60 |
