კარგად გვახსოვს მაშინ შინაგან საქმეთა სამინისტროს მიერ გამოქვეყნებული განცხადება, გურამ დონაძე იყო მათი პრესსამსახური, მის მიერ შედგენილი ცილისმწამებლური განცხადება, რომ თითქოს ეს იყო რაღაც სვანურ კლანებს შორის დაპირისპირება და ამას ემსხვერპლა სანდრო გირგვლიანი, - განაცხადა გადაცემაში „იმედის კვირა“ საქართველოს პარლამენტის ვიცე-სპიკერმა, პარტია „ხალხის ძალის“ თავმჯდომარემ სოზარ სუბარმა სანდრო გირგვლიანის მკვლელობაზე საუბრისას.

მისივე თქმით, ყველაფერი კეთდებოდა, რომ სწორედ ამ მიმართულებით წასულიყო გამოძიება და პრაქტიკულად სიმართლე არ დადგენილიყო.

„დედამისის ირინა ენუქიძის ბრძოლამ მოახდინა გადამწყვეტი როლი და ეს იყო ადამიანი, რომელმაც დაიწყო ბრძოლა, რომ ის არ გაჩერდებოდა, სანამ მისი შვილის მკვლელები არ დაისჯებოდნენ. მეორე გარდამტეხი როლი რამაც ითამაშა, ეს იყო ტელეკომპანია „იმედი“ და ბადრი პატარკაციშვილის სახლთან დამონტაჟებული კამერები, რომლებმაც რეალური სურათის აღდგენის საშუალება მოგვცა, თორემ სინამდვილეში ყველაფერი ჩაიფარცხებოდა“, - აღნიშნა სოზარ სუბარმა.

პარლამენტის ვიცე-სპიკერმა სანდრო გირგვლიანის საქმეზე სტრასბურგის სასამართლოს მიერ მიღებულ გადაწყვეტილებაზეც ისაუბრა.

„ალბათ ვერ ვიტყვით უკეთესად, ვიდრე გააკეთა ადამიანის უფლებათა ევროპულმა სასამართლომ, რომელმაც პირდაპირ თქვა, რომ იყო შემზარავი და გამაოგნებელი ის ფაქტი, რომ საკანონმდებლო და აღმასრულებელი ხელისუფლება, პრეზიდენტი, მთავრობა, პროკურატურა, სასამართლოები, ყველა მუშაობდა იმაზე, როგორ დაეცვათ დამნაშავეები სასჯელისგან, როგორ გაემართლებინათ დამნაშავეები“, - განმარტა სუბარმა.