ჯეფრი ეპშტეინის საქმესთან დაკავშირებით აშშ-ის იუსტიციის დეპარტამენტის მიერ გამოქვეყნებულ ფაილებში ქართველი ბიზნესმენის და თავისუფალი და აგრარული უნივერსიტეტების დამაარსებლის, კახა ბენდუქიძის შესახებაც არის საუბარი.

დოკუმენტის მიხედვით, ფალკონვუდის კორპორაციის თავმჯდომარის თანაშემწემ, დაიანა ვილაბონმა ჯეფრი ეპშტეინს 2010 წლის 30 მარტს გაუგზავნა წერილი და წერილის სათაურის ველში მითითებულია Georgian guy.

„დოქტორი ჯარეკი და ჯიმ მილერი შეხვდებიან ბატონ კახა ბენდუქიძეს, თბილისის თავისუფალი უნივერსიტეტის დამფუძნებელს და დაინტერესდნენ, გსურთ თუ არა თქვენც შეხვედრა. შეხვედრა გაიმართება გრემერსი ჰაუსში, 30.03.10, დილის 11 საათზე. აქ არის ბატონი ბენდუქიძის შესახებ ვიკიპედიის ჩანაწერი: http://en.wikipedia.oro/wiki/Kakha Bendukidze. თუ შეძლებთ დასწრებას, გთხოვთ, რაც შეიძლება მალე შემატყობინოთ“, – ნათქვამია წერილში.