1309
16 მაისი 2020, 22:29
ტელეკომპანია „იმედის“ გადაცემა „ბიზნესი იმედზე“ ავტორი ირაკლი წულაია „ფრონტერას“ საკითხით დაინტერესდა და რამდენიმე კონკრეტული დეტალი გაარკვია. მან ერთმანეთს შეადარა მოსარჩელე მხარეების მიერ მოწოდებული ინფორმაცია და აღმოჩნდა შემდეგი: „ფრონტერას“ ვერსიით, 1997 წლიდან საქართველოში განხორციელებული ინვესტიციის მოცულობა 580 მილიონ დოლარს აღწევს. სახელმწიფო კი ამტკიცებს, რომ თანხა რამდენიმე ასეული მილიონით ნაკლებია. „ფრონტერა“ აცხადებს რომ გათხრილი ჭაბურღილების რაოდენობა 56-ია. სახელმწიფოს ინფორმაციით, „ფრონტერამ“ მხოლოდ 1 ჭაბურღილი გაბურღა და ისიც წარუმატებლად. „ფრონტერა“ ამბობს, რომ 300 მილიარდი კუბური მეტრი გაზის და 10 მილიარდი ბარელი ნავთობის პოტენციალია საქართველოში. სახელმწიფოს განცხადებით, კი ეს მხოლოდ ჰიპოთეტური ციფრებია და დადასტურებული არ არის. 2019 წელს კომპანია „ფრონტერას“ 90-მდე თანამშრომელი გაიფიცა, ისინი აცხადებდნენ, რომ 11 თვის ხელფასი არ აუღიათ. გაფიცულები კომპანიამ სამსახურიდან გაათავისუფლა. კონტრაქტის მიხედვით, 2017 წელს, „ფრონტერას“ უწევდა ტერიტორიის იმ ნაწილის დათმობა, სადაც არ აწარმოებდა ნავთობის მოპოვებას, მაგრამ ტერიტორიის დაბრუნებაზე კომპანიამ უარი განაცხადა, რაც დავის ძირითადი საგანი გახდა. სახელმწიფოს და ფრონტერას დავა განსახილველად საერთაშორისო არბიტრაჟში წავიდა. სასამართლომ თითქმის სრულად დააკმაყოფილა საქართველოს მოთხოვნები და ფრონტერას ტერიტორიის სახელმწიფოსთვის გადაცემა დააკისრა. შეგახსენებთ, რომ კომპანია „ფრონტერა“ საქართველოში 1997 წელს შემოვიდა, მას დედოფლისწყაროს რაიონში ნავთობი და გაზი უნდა მოეპოვებინა.
| სარეკლამო ადგილი - 11 650 x 60 |
