320
18 დეკემბერი 2024, 15:39
ყველამ, ვისაც საღი აზრი ჯერ კიდევ შერჩა, უკვე დიდი ხანია იცის, რომ არამარტო მაკრონი, კიდევ ბევრი გარე ძალა ცდილობს ჩვენი სუვერენიტეტისა და სახელმწიფოებრიობის ფეხით გათელვით საქართველო თავის სტრატეგიულ გეოპოლიტიკურ ინტერესებს დაუქვემდებარონ, - ასე ეხმიანება პოლიტოლოგი ლუკა ეხვაია აზერბაიჯანის პრეზიდენტის, ილჰამ ალიევის განცხადებას, სადაც ის აღნიშნავს, რომ საქართველოში მიმდინარე პროტესტის უკან ემანუელ მაკრონი დგას.
ეხვაიას განცხადებით, ყველა, ვისაც უხარია გარე ძალების მიერ საქართველოს სუვერენიტეტის შელახვა, ირიბად აღიარებს თავის პოლიტიკურ და ინტელექტუალურ უმწიფრობას. მისივე თქმით, ეს ადამიანები ქვეყნის მართვის სადავეებს სიხარულით გადასცემდნენ გარე ძალებს, ამ დროს კი, საზოგადოებას თავისუფლებაზე და დამოუკიდებლობაზე ესაუბრებიან.
„ყველამ, ვისაც საღი აზრი ჯერ კიდევ შერჩა, უკვე დიდი ხანია იცის, რომ არამარტო მაკრონი, კიდევ ბევრი გარე ძალა ცდილობს ჩვენი სუვერენიტეტისა და სახელმწიფოებრიობის ფეხით გათელვით საქართველო თავის სტრატეგიულ გეოპოლიტიკურ ინტერესებს დაუქვემდებარონ, გასაგები მიზეზების გამო პოლიტიკოსები და დიპლომატები სახელდებას ძირითადად ერიდებიან, ეს გამონაკლისი შემთხვევაა.
ვისაც ასე ახარებს და ეზეიმება გარე ძალების მიერ ჩვენი სუვერენიტეტის შელახვა, ირიბად თავიანთ უმწიფრობას, ინტელექტუალურ უმწეობას და დამოუკიდებლად პოლიტიკის წარმოების უუნარობას აღიარებენ, ეს ხალხი ქვეყნის მართვის სადავეებს გარე ძალებს დაუფიქრებლად და უდიდესი სიხარულით ჩააბარებენ და ამ დროს, თავისუფლებაზე, დამოუკიდებლობაზე და სხვა 'ამაღლებული იდეალებზე' ბედავენ საუბარს..“, - წერს ლუკა ეხვაია სოციალურ ქსელში.
ცნობისთვის, აზერბაიჯანის პრეზიდენტმა ილჰამ ალიევმა განაცხადა: „კარგია, რომ საქართველოში ახლა ვითარება სტაბილურობისკენ მიდის და ხედავთ, ისევ მაკრონის ყურები ჩანს. ვერ ისვენებს ადამიანი საკუთარ ქვეყანაში, მას აუცილებლად სჭირდება, საქართველოში ჩაძვრეს“.
| სარეკლამო ადგილი - 11 650 x 60 |
