თუკი ვინმეს ჯერ კიდევ ჰქონდა იმედი, რომ ტრამპი და სი ძინ პინი ვერ შეძლებდნენ თანამშრომლობას და მათ შორის დაძაბული პოლიტიკის ფონზე, საქართველოში ოპოზიცია ხელს მოითბობდა, ეს იმედიც საბოლოოდ დაემსხვრათ, - წერს პარტია „ხალხის ძალის“ წევრი თამარ ჩიბურდანიძე სოციალურ ქსელში.

იგი აღნიშნავს, რომ ინაუგურაციამდე დონალდ ტრამპმა ორ მნიშვნელოვან შეთანხმებას უკვე მიაღწია - ჩინეთთან მშვიდობიანი თანაცხოვრების და დაბალანსებული ვაჭრობის დეკლარირება და ისრაელი-ღაზას შორის შეთანხმება.

თამარ ჩიბურდანიძე წერს, რომ აშშ-ის ახალმა პრეზიდენტმა მსოფლიოში მშვიდობიანი თანაცხოვრება აირჩია, რასაც ჩინეთთან ურთიერთობების დამყარება ამტკიცებს. ამ პროცესების ფონზე კი ქართული ოპოზიცია უმძიმეს მდგომარეობაშია.

„ამერიკის ახალმა პრეზიდენტმა რადიკალურად შეცვალა გლობალური პოლიტიკის რაკურსი და მსოფლიოს ახალ გიგანტ სახელმწიფოსთან ომის ნაცვლად, მშვიდობიანი თანაცხოვრება არჩია. ამას ველოდით და ამის შესახებ არაერთხელ გაგვიკეთებია განცხადება, რასაც ოპოზიცია ქილიკით პასუხობდა.

დღეს კი მათი მოლოდინები საბოლოოდ დაიმსხვრა. ლიბერალების ლობისტური პოლიტიკა საქართველოში ამ განცხადებით მკვეთრად სუსტდება. თუკი ვინმეს ჯერ კიდევ ჰქონდა იმედი, რომ ტრამპი და სი ძინ პინი ვერ შეძლებდნენ თანამშრომლობას და მათ შორის დაძაბული პოლიტიკის ფონზე, საქართველოში ოპოზიცია ხელს მოითბობდა, ეს იმედიც საბოლოოდ დაემსხვრათ.

სი ძინ პინისა და დონალდ ტრამპის შეთანხმება „მშვიდობიანი თანაცხოვრებისთვის და მსოფლიოს უსაფრთხოებისთვის“, ამყარებს საქართველოს ხელისუფლების პოლიტიკას, ჰყავდეს ძლიერი პარტნიორები ამერიკა-ჩინეთის სახით. მითუმეტეს, როდესაც ისინი თანხმდებიან დაბალანსებულ ვაჭრობაზე, რისი ინტერესებიც სწორედ სამხრეთ კავკასიაში იკვეთება. საქართველოს ეძლევა ხანგრძლივი მშვიდობიანი განვითარების შანსი.

მსოფლიოში უკვე გამოიკვეთა ორი პოლიტიკური პოლუსი ამერიკა-ჩინეთის სახით. რუსეთი ამ ეტაპზე ჩინეთის ჩრდილშია, თუმცა, რჩება მსოფლიოს ერთ-ერთ მსხვილ მოთამაშედ. ბრიტანეთი ახალ სქემას ქმნის მის ირგვლივ და ალბათ ეს იქნება კიდევ ერთი ახალი სიტყვა მსოფლიო პოლიტიკაში. რაც შეეხება ევროპას, ის ჯერ მსხვერპლი იყო უკრაინის ომის და ახლა იძულებული გახდება მიიღოს ახალი რეალობა. რაც მთავარია, ევროკავშირის პოლიტიკური დასუსტების ფონზე, ძლიერდება ინტერესები სამხრეთ კავკასიაში, როგორც ახალ გეოპოლიტიკურ ეპიცენტრში. ეს კი უზრუნველყოფს ჩვენი რეგიონის და ჩვენი ქვეყნის ეკონომიკურ განვითარებას, ასევე ტერიტორიული მთლიანობის აღდგენას.

დონალდ ტრამპმა ინაუგურაციის წინ ორი მნიშვნელოვანი ფაქტი უკვე შექმნა - ჩინეთთან მშვიდობიანი თანაცხოვრების და დაბალანსებული ვაჭრობის დეკლარირება და ახლო აღმოსავლეთში ისრაელი-ღაზას შორის შეთანხმების მიღწევა. ახლა ჯერი რუსეთ-უკრაინის ომზეა და ველით უმოკლეს პერიოდში ამ კონფლიქტის დასრულებას.

ამ პროცესებიდან გამომდინარე, ოპოზიცია უმძიმეს მდგომარეობაშია, მათი პოლიტიკა რეკორდული სისწრაფით თავდაღმა მიექანება“, - წერს თამარ ჩიბურდანიძე.