220
20 მაისი 2025, 11:23
სულ რაღაც რამდენიმე დღის წინ აშშ-ის პრეზიდენტის, დონალდ ტრამპის უკრაინაში ცეცხლის 30-დღიანი შეწყვეტისკენ მოწოდებამ და რუსეთის მიმართ ახალი სანქციების დაწესების მუქარამ ევროპელ ლიდერებში ფრთხილი ოპტიმიზმი გააღვიძა, თუმცა მისმა ბოლო სატელეფონო საუბარმა რუსეთის პრეზიდენტთან, ვლადიმერ პუტინთან ყველა ეს იმედი დაამსხვრია. სტატიას ამ შინაარსით Bloomberg-ი ავრცელებს.
სააგენტოს ინფორმაციით, გუშინ პუტინთან გამართული სატელეფონო საუბრის შემდეგ ტრამპმა სოციალურ ქსელში დაწერა, რომ უკრაინა და რუსეთი დაუყოვნებლივ დაიწყებენ მოლაპარაკებებს ცეცხლის შეწყვეტის შესახებ, თუმცა აშშ, სავარაუდოდ, ამაში მონაწილეობას არ მიიღებს. მას სანქციების, ზუსტი გრაფიკი ან პუტინზე ზეწოლა არ უხსენებია.
მიუხედავად იმისა, რომ პუტინთან საუბრის შემდეგ ტრამპი ევროპელ ლიდერებს დაუკავშირდა, ბევრი მათგანი უკვე იმედგაცრუებულია, წერს Bloomberg-ი.
ერთ-ერთმა ევროპელმა მაღალჩინოსანმა სააგენტოს განუცხადა, რომ „ლიდერები შიშობენ, რომ ტრამპი დიპლომატიურ ძალისხმევაზე უარს აცხადებს“. მეორე ჩინოვნიკმა დაადასტურა, რომ ტრამპმა მკაფიოდ თქვა, ის არ აპირებს მოსკოვზე ზეწოლას ახალი სანქციებით. მისი თქმით, არც კიევი, არც ევროპელი მოკავშირეები უკრაინასა და რუსეთს შორის უშუალო მოლაპარაკებების იდეას არ იზიარებენ.
„დღეს იქმნება შთაბეჭდილება, რომ ჩვენ უფრო გრძელვადიან სცენარს დავუბრუნდით, სადაც პუტინი საკუთარი თავისთვის და სამხედროებისთვის დროს ყიდულობს“, - განუცხადა Bloomberg-ს გერმანიის „მარშალის ფონდის“ მკვლევარმა, კრისტინ ბერზინამ. „პუტინმა სულ უფრო მეტი შესაძლებლობა მიიღო, ხოლო ცეცხლის შეწყვეტა და დარეგულირება სულ უფრო შორეულ პერსპექტივას ჰგავს“.
| სარეკლამო ადგილი - 11 650 x 60 |
