387
18 ივნისი 2025, 17:39
„საქართველო უკვე „გამოვიდა იმ ასაკიდან“, როცა მსგავსი ინიციატივები იარსებებს თუ არა, მასზე რაიმე ზეგავლენას მოახდენს“, - ამის შესახებ მედიასთან „ხალხის ძალის“ წევრმა დავით ქართველიშვილმა განაცხადა, ევროპარლამენტში საქართველოს მხარდამჭერი რეზოლუციის პროექტის შესახებ საუბრისას, რომელიც „სუვერენულ სახელმწიფოთა ევროპის“ ჯგუფის მიერ მომზადდა, თუმცა იქვე აღნიშნა, რომ ეს 27 ევროდეპუტატის მიერ გადადგმული გმირული ნაბიჯია და ამისთვის მათ მადლობა გადაუხადა.
დავით ქართველიშვილის თქმითვე, საქართველო იმ ევროდეპუტატებისა და მათი ქვეყნებისთვის ძალიან კარგი მაგალითია იმისა, თუ როგორ შეიძლება პატარა ქვეყანამ, მცირერიცხოვანი მოსახლეობით, ბრძოლა გამოუცხადოს იმ „დიფ სთეითს“, რომელიც თვითონ ევროკავშირის წიაღში ამ ქვეყნების საზოგადოებებს უტევს.
„რა თქმა უნდა, 27-ვე ევროდეპუტატს, რომელთაც ეს გმირობა ჩაიდინეს, მადლობა მინდა გადავუხადო. იმ ველზე თვითონაც მძევლობაში იმყოფებიან და „დიფ სთეითის“ ზურგში მოქმედებენ თავიანთი ქვეყნების კონსერვატიული, ტრადიციული საზოგადოებების სახელით და ტრიბუნას იყენებენ პირველ რიგში იმისთვის, რომ საკუთარ პოლიტიკურ ელიტებს, ამომრჩეველსა და საზოგადოებებს მიმართონ.
საქართველო მათთვის ძალიან კარგი მაგალითია იმისა, თუ როგორ შეიძლება პატარა ქვეყანამ, მცირერიცხოვანი მოსახლეობით, ასეთი ბრძოლა გამოუცხადოს იმ „დიფ სთეითს“, რომელიც თვითონ ევროკავშირის წიაღში ამ ქვეყნების საზოგადოებებს უტევს. ეს ძალა მათში ანგრევს იმ ცივილიზაციურ ფასეულობებს, რომლებზეც ესა თუ ის ევროპული ქვეყანა აღმოცენდა და შექმნა ევროპული ქვეყნების კავშირი, რომელიც ჩვენთვის ადრე მიმზიდველი იყო, ხოლო დღეს უკვე ასე საერთოდ არ არის არის, რადგან ტოტალურ უსამართლობაზე დაყრდნობით ახორციელებს თავის პოლიტიკას საქართველოს წინააღმდეგ. ამიტომ, კიდევ ერთხელ ვამბობ - მადლობა ამ ფრაქციას, მადლობა ამ დეპუტატებს და იმედია, 2029 წლისთვის, როდესაც ახალი მოწვევის ევროპარლამენტს ვიხილავთ, სულ ცოტა, 27 კონსერვატორი დეპუტატი მაინც იქნება მასში“, - აღნიშნა დავით ქართველიშვილმა.
| სარეკლამო ადგილი - 11 650 x 60 |
