დავით აღმაშენებლის სახელობის საქართველოს ეროვნული თავდაცვის აკადემიის 106 წლის იუბილე პირად შემადგენლობას, იუნკრებსა და მსმენელებს მივულოცე და აკადემიის კურსდამთავრებულებს დიპლომები საზეიმო ვითარებაში გადავეცი, – ამის შესახებ საქართველოს პრეზიდენტი მიხეილ ყაველაშვილი სოციალურ ქსელში წერს.
მისივე თქმით, ღონისძიების ფარგლებში, თავდაცვის მინისტრსა და თავდაცვის ძალების მეთაურთან ერთად, აკადემიის ბიბლიოთეკაში ოკუპაციის მუზეუმი გახსნა.
„დღეს აკადემიის კურსდამთავრებულები შეუერთდნენ იმ დიდებული ქართველი ოფიცრების რიგებს, რომელთა სიმამაცეზე, პატრიოტიზმსა და პროფესიონალიზმზე იდგა, დგას და მომავალშიც იდგება ჩვენი ქვეყნის ღირსება და უსაფრთხოება. მადლობას ვუხდი საქართველოს თავდაცვის სამინისტროს ხელმძღვანელობას და თითოეულ თანამშრომელს დაკისრებული მოვალეობის უმაღლეს დონეზე შესრულებისთვის. ქართველი სამხედროების ერთგულება, თავდადება და სამშობლოს უანგარო სიყვარული ის საფუძველია, რომელზეც ჩვენი ქვეყნის მშვიდობიანი აწმყო და მომავალი დგას. კიდევ ერთხელ ვულოცავ და წარმატებას ვუსურვებ კურსდამთავრებულებს. ღმერთი იყოს ჩვენი სამშობლოსა და თქვენი მფარველი“, – წერს ყაველაშვილი.
| სარეკლამო ადგილი - 11 650 x 60 |
