სომხეთის პრემიერ-მინისტრის, ნიკოლ ფაშინიანის თქმით, რევოლუციისკენ მოუწოდებს იმ მოქალაქეებს, ვინც ყარაბაღის საკითხთან დაკავშირებით მის მიდგომას არ ეთანხმება. ნიკოლ ფაშინიანის თქმით, ის ყარაბაღის მოძრაობაში მეშვიდე კლასიდან იყო ჩართული და 2025 წლის მარტში პარლამენტის ტრიბუნიდან, როგორც პრემიერ მინისტრმა, საკუთარი გამოცდილებიდან გამომდინარე განაცხადა, რომ ყარაბაღის მოძრაობა არ უნდა გაგრძელდეს და სწორედ ამ პრინციპით აპირებს ქვეყნის ხელმძღვანელობას.
„მე მაშინ ვთქვი, თუ სომხეთის მოქალაქეები მიიჩნევენ, რომ ეს ასე არ უნდა იყოს, მე თავად მოვუწოდებ მოქალაქეებს რევოლუციისკენ. ვვარაუდობ, რომ პირველი და ერთადერთი პრემიერ-მინისტრი ვარ მსოფლიოს ისტორიაში, რომელმაც თავად მოუწოდა საკუთარი ქვეყნის მოქალაქეებს რევოლუციისკენ, თუ ისინი არ ეთანხმებიან გაცხადებულ სტრატეგიას. მეორე ასეთ შემთხვევას მე არ ვიცნობ. ფაქტია, რომ ჩვენმა მოქალაქეებმა არ მოაწყვეს რევოლუცია, რადგან მიხვდნენ, ისევე როგორც მე, რომ ამ გადაწყვეტილების გარეშე მშვიდობა შეუძლებელია, როგორც პრაქტიკულად, ისე თეორიულად“, – განაცხადა ფაშინიანმა.
მისი თქმით, სხვები ყარაბაღის მოძრაობას სხვაგვარად ხედავენ და მას სასარგებლო ბერკეტად მიიჩნევენ, რომელსაც შეუძლია, ხელი შეუშალოს სომხეთის სუვერენიტეტს, სახელმწიფოებრიობას და კეთილდღეობას.
„უნდა ვაღიაროთ, რომ ეს ბერკეტი კარგად იყო გამოყენებული. ახლა დადგა მშვიდობის ეპოქა და სომხეთის მოქალაქეებმა ეს კმაყოფილებით მიიღეს. ამის ბევრი მტკიცებულება არსებობს“, – განაცხადა ფაშინიანმა.
| სარეკლამო ადგილი - 11 650 x 60 |
