ჩინეთში მეცნიერებმა მსოფლიოში პირველად გადაუნერგეს კლინიკური სიკვდილის მდგომარეობაში მყოფ ადამიანს გენეტიკურად მოდიფიცირებული ღორის ფილტვი. სხეულმა ორგანო არ უარყო, რაც ტრანსპლანტაციისთვის ცხოველების ორგანოების პერსპექტიულობას ადასტურებს.
„ტრანსგენური ღორების ფილტვები ადამიანის სხეულში აქამდე არასოდეს გადაუნერგიათ, შედეგად არ გვქონდა მონაცემები იმის შესახებ თუ რა რეაქცია ექნება პაციენტის იმუნიტეტს ამაზე“, - აღნიშნეს ექიმებმა. მათ დაადასტურეს, რომ გადანერგილი ორგანო 216 საათის განმავლობაში ფუნქციონირებდა.
პროექტს პროფესორი ჰე ჯიანსინი ხელმძღვანელობდა, გუანჯოუს სამედიცინო უნივერსიტეტიდან, რომლის გუნდი გენმოდიფიცირებული ღორების შექმნაზე მუშაობს.
ფილტვი 39 წლის კაცს გადაუნერგეს, რომელსაც ინსულტის შემდეგ კლინიკური სიკვდილი დაუფიქსირეს. ამ ორგანოს სიცოცხლისუნარიანობის მიუხედავად, მესამე დღეს მედიკოსებმა აღმოაჩინეს, რომ პაციენტმა ღორის ქსოვილისადმი ანტისხეულები გამოიმუშავა, ამასთან, დაფიქსირდა ანთების ნიშნები და იმუნურ პასუხთან დაკავშირებული პოტენციური დაზიანებები. მეცნიერების თქმით, ეს იმის ნიშანია, რომ პაციენტის სრული უსაფრთხოებისთვის ღორის დნმ-ის შემდგომი სრულყოფა არის საჭირო.
| სარეკლამო ადგილი - 11 650 x 60 |
