თურმე შავმა ფულმა საქართველოში უნდა იტრიალოს ისე, რომ არავინ არაფერი იცოდეს და ამერიკაში და სხვა ქვეყანაში „გამჭვირვალობის კანონი“ მართალია, - განაცხადა აშშ-ის სენატში ინიცირებულ, „ფარას“ გამკაცრების კანონპროექტზე საუბრისას პარტია „ხალხის ძალის“ აღმასრულებელმა მდივანმა, გურამ მაჭარაშვილმა.

„ახლა იქ რომ მკაცრდება ის კანონი, გააკრიტიკოს ბატონმა ელჩმა. ეს ორმაგი სტანდარტებიც აღარ არის, ეს არის პირდაპირ საქართველოს საზოგადოების შეურაცხყოფა, როდესაც საუბარია, რომ თურმე შავმა ფულმა საქართველოში უნდა იტრიალოს ისე, რომ არავინ არაფერი იცოდეს და ამერიკაში და სხვა ქვეყანაში „გამჭვირვალობის კანონი“ მართალია. ეს ორმაგი სტანდარტები არის ის, რის გამოც აბსოლუტური ნულოვანია ევროკავშირის ელჩის სანდოობა საქართველოს საზოგადოების მხრიდან“, - აღნიშნა გურამ მაჭარაშვილმა.

ამერიკის შეერთებული შტატების სენატში ინიცირებულია კანონპროექტი S.3050, რომელიც მიზნად ისახავს 1938 წლის „უცხოელი აგენტების რეგისტრაციის აქტში“ (FARA) ცვლილებების შეტანას.

როგორც აშშ-ის კონგრესის საიტზე გამოქვეყნებულ ინფორმაციაშია აღნიშნულია, ცვლილებები შეეხება ამ აქტით გათვალისწინებული გამონაკლისების მოთხოვნების მოდიფიცირებას.