ანალიტიკოსი ზაალ ანჯაფარიძე „ევროპული საქართველოს” გენერალური მდივნის, აკაკი ბობოხიძის განცხადებას სოციალურ ქსელში ეხმიანება და აღნიშნავს, რომ ევროკომისარ მარტა კოსის აღიარების შემდეგ, რომლის თანახმად, ევროკავშირი შემოვლითი გზებითაც, შეეცდება ადგილობრივი რეზიდენტურის დაფინანსებას, საქართველოში მოქმედი პოლიტიკური აქტორებიც საჯაროდ ამჟღავნებენ საკუთარ როლს გარე ძალების ინტერესებში.

ანჯაფარიძის თქმით, ბობოხიძის განცხადება ცხადყოფს, რომ ოპოზიციის ძირითადი მისია არა მოქალაქეებთან მუშაობა, არამედ გარე ცენტრებთან „დასმენების” და დეზინფორმაციის გაგზავნის პროცესში მონაწილეობაა, რასაც თავადვე უკავშირებენ ქვეყნისთვის სანქციების მოტანას და ზეწოლის გაძლიერებას, იმ იმედით, რომ ეს ვითარება მათ პოლიტიკურად დაეხმარება.

„გარე აქტორის, ევროკომისარ მარტა კოსის გუშინდელ აღიარებას, რომ ყველა, მათ შორის, შემოვლითი გზებით, შეეცდებიან მათი აქაური რეზიდენტურა ფულით მოამარაგონ, მოჰყვა უკვე ადგილობრივი აქტორის აღიარება, რომელიც ოპოზიციის მთავარ მისიას ხედავს, არა ხალხთან, არამედ გარე ძალებთან მუშაობაში, ანუ დასმენებში, დეზინფორმაციის გაგზავნაში და ა.შ. რომელთაც უნდა მოჰყვეს სხვადასხვა სასჯელები ქვეყნისთვის, რომ ამით ოპოზიციას ეშველოს, როგორც თავად თვლიან.

შესაბამისად, ასეთი ძალებისგან ქვეყნის პოლიტიკური ველის გაწმენდა უკვე ბუნებრივი მოთხოვნა და საჭიროება ხდება, და „ქართულმა ოცნებამ“ საერთოდ ხელი რომ არ გაანძრიოს, ეს ბუნებრივად მოხდება, ოღონდ ცოტა დროში გაიწელება. ახლა კი ხდება უბრალოდ ამ პროცესის ცოტა დაჩქარება, შექმნილი აუცილებლობიდან გამომდინარე. მითუმეტეს, რომ აგენტურამ ფაქტობრივად თვითლუსტრაცია გამოაცხადა“, - წერს ზაალ ანჯაფარიძე.