ამერიკის შეერთებულმა შტატებმა ცენტრალური როლი ითამაშა საერთაშორისო წესრიგის ჩამოყალიბებაში. მონროს დოქტრინიდან დაწყებული, რომელმაც ჩვენს რეგიონში ერებს საშუალება მისცა, აყვავებულიყვნენ ჩვენი ნახევარსფეროს გარე ჩარევისგან თავისუფლად, გაერო-ს დაარსებაში ჩვენი გადამწყვეტი როლით, ჩრდილოატლანტიკური ხელშეკრულების ორგანიზაციის ფარგლებში უსაფრთხოების მთავარი გარანტორის როლით და მსოფლიოში უდიდესი ჰუმანიტარული დონორის როლით დამთავრებული – ამერიკის ლიდერობა უდავოა, – ამის შესახებ აშშ-ის სახელმწიფო მდივნის, მარკო რუბიოს განცხადებაშია აღნიშნული.
სახელმწიფო დეპარტამენტის ვებგვერდზე გამოქვეყნებულ განცხადებაში რუბიო განმარტავს, რატომ გადაწყვიტა აშშ-მა 66 საერთაშორისო ორგანიზაციის დატოვება.
როგორც რუბიოს განცხადებაშია აღნიშნული, ლიდერობა მოითხოვს რთულ არჩევანს და იმის ამოცნობის უნარს, თუ როდის იქცა მშვიდობის, კეთილდღეობისა და თავისუფლების ხელშეწყობის მიზნით შექმნილი ინსტიტუტები ამ მიზნების მიღწევის დაბრკოლებად.
„ის, რასაც ჩვენ „საერთაშორისო სისტემას“ ვუწოდებთ, ახლა ასობით გაუმჭვირვალე საერთაშორისო ორგანიზაციითაა გადატვირთული, რომელთაგან ბევრს გადაჭარბებული მანდატები, დუბლირებული ქმედებები, არაეფექტური შედეგები და ცუდი ფინანსური და ეთიკური მმართველობა აქვს. ის ორგანიზაციებიც კი, რომლებიც ოდესღაც სასარგებლო ფუნქციებს ასრულებდნენ, სულ უფრო არაეფექტიან ბიუროკრატიად, პოლიტიზებული აქტივიზმის პლატფორმებად ან ჩვენი ერის ინტერესების საწინააღმდეგო ინსტრუმენტებად იქცევიან. ეს ინსტიტუტები არა მხოლოდ შედეგებს არ იძლევა, არამედ ხელს უშლიან მათ ქმედებებს, ვისაც ამ პრობლემების მოგვარება სურს. საერთაშორისო ბიუროკრატიებისთვის ცარიელი ჩეკების გაცემის ერა დასრულდა. ამ კვირაში, აღმასრულებელი ბრძანების შესაბამისად, პრეზიდენტმა ტრამპმა გამოაცხადა ჩვენი გასვლა 66 საერთაშორისო ორგანიზაციიდან, რომლებიც ტრამპის ადმინისტრაციის მიერ ფლანგვად, არაეფექტურ და მავნე საერთაშორისო ორგანიზაციებად იყო მიჩნეული. საპრეზიდენტო მემორანდუმი მიზნად ისახავს დავტოვოთ არასწორად მართული, არასაჭირო, ფლანგვადი ინსტიტუტები, ინსტიტუტები, რომლებიც ცუდად ფუნქციონირებს, ჩვენი დღის წესრიგის საწინააღმდეგოდ მომუშავე აქტორების ინტერესების ქვეშ მყოფია ან ჩვენი ერის სუვერენიტეტის, თავისუფლებებისა და ზოგადი კეთილდღეობისთვის საფრთხეს წარმოადგენენ“, – ნათქვამია განცხადებაში.
რუბიოს განცხადების თანახმად, აღარ არის მისაღები ამერიკელი ხალხის შრომით გამომუშავებული დოლარების ინვესტირება ინსტიტუტებში, რომლებსაც არ შეუძლიათ შედეგების, ანგარიშვალდებულების ან აშშ-ის ეროვნული ინტერესების პატივისცემის დემონსტრირება.
„იმ ორგანიზაციების დაფინანსებისა და ხელშეწყობის გაგრძელება, რომლებიც ხელს უშლიან დღეს მსოფლიოს წინაშე არსებული პრობლემების გადაჭრას, როგორიცაა ხელმისაწვდომი ენერგია, ეკონომიკური ზრდა და ეროვნული სუვერენიტეტი, არის ამერიკის გლობალური ლიდერობის უარყოფა. აშშ-ს მათში მონაწილეობა მხოლოდ ამართლებს მათ არსებობას და მოდელს, რომელმაც მთელ მსოფლიოში მილიარდობით ადამიანს იმედი გაუცრუა. დაწყებული გაერო-ს მოსახლეობის ფონდის ეთიკური დარღვევების ხანგრძლივი ისტორიიდან, მათ შორის იძულებითი აბორტების დაფინანსებიდან, დასრულებული გაერო-ს ქალთა ორგანიზაციის უუნარობით, რომელსაც იმის განსაზღვრაც არ შეუძლია, თუ რა არის ქალი. კლიმატის ცვლილების შესახებ გაერო-ს ჩარჩო კონვენცია, რომელიც მილიონობით დოლარს ხარჯავს დასავლეთ სანაპიროსა და ღაზაში კლიმატის ცვლილების შემაშფოთებელი, ანტიენერგეტიკული ინვესტიციების დაფინანსებაზე, აფრიკული წარმოშობის ხალხთა გაერო-ს მუდმივი ფორუმი, რომელიც ღიად რასისტულ პოლიტიკას უჭერს მხარს გლობალური რეპარაციების მხარდასაჭერად – ეს ორგანიზაციები აჩვენებენ არაეფექტურობას თუ არა, აშკარა ბოროტებას. ამერიკელი ხალხი, ჩვენი პარტნიორები და მთელს მსოფლიოში მილიარდობით ადამიანი, რომლებიც შეერთებული შტატებისგან ლიდერობას ელოდებიან, უკეთესს იმსახურებენ. ჩვენი მუდმივი მონაწილეობა ორგანიზაციებში, რომლებიც არ ასახავს ჩვენს ღირებულებებს ან არ ემსახურება ჩვენს ინტერესებს, ჩვენი ეროვნული მოვალეობის მიტოვება იქნება“, – ნათქვამია განცხადებაში.
როგორც აშშ-ის სახელმწიფო მდივნის განცხადებაშია აღნიშნული, შეერთებული შტატების საერთაშორისო ორგანიზაციებში მონაწილეობის საკითხის განხილვა კვლავ გრძელდება, თუმცა „ეს არ ნიშნავს, რომ ამერიკა ზურგს აქცევს მსოფლიოს“.
„ორგანიზაციები, რომელთაგანაც გასვლა გადავწყვიტეთ, შეირჩა ხანგრძლივი განხილვის შემდეგ, მათი მიზნის, ქმედებების, ეფექტიანობის, აუცილებლობისა და რაც მთავარია, მათი უნარის მიხედვით, დაგვეხმარონ აშშ-ის ეროვნული ინტერესების მიღწევაში. ის ორგანიზაციები, საიდანაც გავდივართ, არავითარ შემთხვევაში არ არიან ერთადერთი დამნაშავეები. შეერთებული შტატების საერთაშორისო ორგანიზაციებში მონაწილეობის ჩვენი განხილვა კვლავ გრძელდება. ეს არ ნიშნავს, რომ ამერიკა ზურგს აქცევს მსოფლიოს. ჩვენ უბრალოდ უარვყოფთ მულტილატერალიზმის მოძველებულ მოდელს – ისეთს, რომელიც ამერიკელ გადასახადის გადამხდელს განიხილავს როგორც გლობალური მმართველობის ფართო არქიტექტურის გარანტს.
ტრამპის ადმინისტრაცია რეალურ შედეგებს მოითხოვს იმ ინსტიტუტებისგან, რომლებსაც ჩვენ ვაფინანსებთ და რომლებშიც ვმონაწილეობთ და ჩვენ მზად ვართ, რეფორმების კამპანიას ვუხელმძღვანელოთ. პრეზიდენტმა ტრამპმა ნათლად განაცხადა, მათ შორის ამ კვირის საპრეზიდენტო მემორანდუმში, რომ ის არ დაუშვებს, საერთაშორისო ორგანიზაციებმა ძირი გამოუთხარონ შეერთებულ შტატებს და შეზღუდონ ჩვენი ეროვნული სუვერენიტეტი, ჩვენი ენერგეტიკული დამოუკიდებლობა, ჩვენი ეკონომიკური კეთილდღეობა, ჩვენი დემოკრატია და ჩვენი კონსტიტუციური თავისუფლება. ის არ დაუშვებს, რომ შეერთებულმა შტატებმა გააგრძელოს წარუმატებელი მოდელის დაფინანსება. ამ კვირის საპრეზიდენტო მემორანდუმმა აჩვენა, რომ ამერიკა აღარ იღებს დაზიანებულ სტატუს კვოს, რომ ეს ერი მზადაა ლიდერობისთვის, როგორც ეს ყოველთვის იყო და რომ ზოგჯერ ნამდვილი ლიდერობა ნიშნავს იმის ცოდნას, თუ როდის უნდა დატოვო“, – ნათქვამია მარკო რუბიოს განცხადებაში.
| სარეკლამო ადგილი - 11 650 x 60 |
