თანამედროვე საერთაშორისო ვაჭრობაში და გეოპოლიტიკურ პროცესებში ჩინეთის იგნორირება შეუძლებელია, - განაცხადა გადაცემაში „EURO ანატომია“ პოლიტოლოგმა ირაკლი გოგავამ.
„ის არის ერთ-ერთი ძალის ცენტრი. განსაკუთრებით, მისი ეკონომიკური პოტენციალი ღირსშესანიშნავია. შესაბამისად, ევროკავშირი და ევროპის ქვეყნები სწორედ მიილტვიან იმისთვის, რომ ჩინეთთან მჭიდრო ურთიერთობები ჰქონდეთ.
რომ გადავხედოთ კონკრეტიკასაც, მათი ურთიერთობები საკმაოდ შთამბეჭდავია. მაგალითად, ევროპამ კარი გაუღო ჩინურ ინვესტიციას და ლუქსემბურგის ბანკი იყიდეს. მაგალითად, რამდენიმე პორტი მთლიანად კონტროლდება ევროპაში ჩინური კომპანიების მიერ. პირეოსის პორტი, როტერდამის პორტში აქციები აქვთ. ბილბაოს, ვალენსიას პორტი და კიდევ სხვა პორტები. მაგალითად, ზებრიუგეს პორტი და ა.შ.“, - აღნიშნა ირაკლი გოგავამ.
კითხვაზე, რა იცვლება პოლიტიკური თვალსაზრისით, ირაკლი გოგავას თქმით, ევროკავშირი თავისი საგარეო ვექტორების დივერსიფიკაციას ცდილობს.
„გამომდინარე იქიდან, რომ არსებობს უკვე ღია კონფლიქტი შეერთებული შტატების ახალ ადმინისტრაციასთან, ევროპა ცდილობს თავისი რისკები დააზღვიოს როგორც პოლიტიკური, ასევე ეკონომიკური. ეს ორი ერთმანეთთან გადაჯაჭვულია“, - განაცხადა მან.
| სარეკლამო ადგილი - 11 650 x 60 |
