ფინანსური ნაკადების ნაწილი, რომელიც ადრე ახლო აღმოსავლეთის ქვეყნებსა და მიმდებარე ბაზრებს მიემართებოდა, თანდათან გადაადგილდება უფრო სტაბილური მიმართულებებისკენ. ერთ-ერთ ასეთ მიმართულებად დღეს სწორედ საქართველო განიხილება, - წერს სოციალურ ქსელში „ხალხის ძალის“ წევრი დავით ქართველიშვილი, რომელიც ახლო აღმოსავლეთში მიმდინარე პროცესებს და ამ დაძაბულობის ფონზე საქართველოს როლს აფასებს.

უცხოური ინვესტიციების და კაპიტალის საქართველოში მობილიზების კუთხით ხელსაყრელ გარემოზე აქცენტისას, ექსპერტი ყურადღებას სტატისტიკის სამსახურის მონაცემზე ამახვილებს და აღნიშნავს, რომ ქვეყნის ეკონომიკა 2026 წლის იანვარში წლიურად 7,9 %-ით გაიზარდა, რაც რეგიონში ერთ-ერთი ყველაზე მაღალი მაჩვენებელია.

„არც ერთი დღე პოზიტივის გარეშე. როგორც ჩვენ ამას ვვარაუდობდით, ახლო აღმოსავლეთში მზარდი არასტაბილურობის ფონზე, საქართველო სულ უფრო მეტად იქცევა რეგიონის ერთგვარ „მშვიდ ნავსაყუდლად“ კაპიტალისა და ინვესტიციებისთვის სამხრეთ კავკასიაში.

ანალიტიკოსების შეფასებით, ფინანსური ნაკადების ნაწილი, რომელიც ადრე ახლო აღმოსავლეთის ქვეყნებსა და მიმდებარე ბაზრებს მიემართებოდა, თანდათან გადაადგილდება უფრო სტაბილური მიმართულებებისკენ. ერთ-ერთ ასეთ მიმართულებად დღეს სწორედ საქართველო განიხილება, სადაც ერთმანეთს ერწყმის შედარებით პოლიტიკური სტაბილურობა, ლიბერალური ეკონომიკური გარემო და ბიზნესისთვის უსაფრთხოების მაღალი დონე. მაკროეკონომიკური მაჩვენებლები ამ ტენდენციას ადასტურებს.

„საქსტატის“ წინასწარი მონაცემებით, საქართველოს ეკონომიკა 2026 წლის იანვარში წლიურად 7,9 %-ით გაიზარდა, რაც რეგიონში ერთ-ერთი ყველაზე მაღალი მაჩვენებელია. საერთაშორისო ფინანსური ინსტიტუტებიც ოპტიმისტურ პროგნოზებს ინარჩუნებენ: ევროპის რეკონსტრუქციისა და განვითარების ბანკი ეკონომიკის დაახლოებით 5,5 %-იან ზრდას პროგნოზირებს, ხოლო მსოფლიო ბანკის შეფასებით, საქართველო სამხრეთ კავკასიის მეზობელ ქვეყნებზე სწრაფად განვითარდება - დაახლოებით 5,5 % საქართველოსთვის, 4,9 % სომხეთისთვის და დაახლოებით 1,8 % აზერბაიჯანისთვის.

ინვესტიციების ზრდის ერთ-ერთ მთავარ მამოძრავებელ ძალად რჩება ტურიზმის სექტორი და სასტუმროების უძრავი ქონება, რომელიც საერთაშორისო ინვესტორებისთვის განსაკუთრებით მიმზიდველი ხდება. ტურიზმიდან მიღებული შემოსავლები კვლავ იზრდება: მხოლოდ 2026 წლის იანვარში ისინი 13,4 %-ით გაიზარდა და დაახლოებით 325 მილიონ დოლარს მიაღწია, ხოლო წლის ბოლოსთვის ანალიტიკოსები დაახლოებით 5 მილიარდ დოლარამდე ტურისტულ შემოსავალს პროგნოზირებენ. ეს მაჩვენებლები ახალ სასტუმროებს, ინფრასტრუქტურის განვითარებას და საერთაშორისო საინვესტიციო პროექტების გააქტიურებას უწყობს ხელს.

სტრატეგიული თვალსაზრისით მიმდინარე პროცესები ცხადყოფს, რომ საქართველო რეგიონში საკუთარ როლს თანდათან აძლიერებს. გლობალური ტურბულენტობის ფონზე ქვეყანა უფრო მკაფიოდ ყალიბდება როგორც რეგიონული ეკონომიკური და საინვესტიციო ჰაბი, სადაც ერთიანდება სტაბილური მაკროეკონომიკა, სწრაფად მზარდი ტურიზმის სექტორი და საგარეო პოლიტიკა, რომელიც მშვიდობასა და სტაბილურობაზეა ორიენტირებული. სწორედ ამ ფაქტორების ერთობლიობა აქცევს დღეს საქართველოს სამხრეთ კავკასიის ერთ-ერთ ყველაზე დინამიკურად განვითარებად ეკონომიკად და ზრდის მის მიმზიდველობას საერთაშორისო კაპიტალისთვის,“ - წერს დავით ქართველიშვილი.