გაფართოებულ კრებაზე, სადაც წმინდა სინოდის მიერ გამორჩეული პატრიარქობის კანდიდატები იქნებიან წარდგენილნი, 2 000-მდე ადამიანს ელოდებიან, - განუცხადა საპატრიარქოსთან ჟურნალისტებს ახალქალაქისა და კუმურდოს ეპარქიის მიტროპოლიტმა, მეუფე ნიკოლოზმა (ფაჩუაშვილი).
მისივე თქმით, დღევანდელ სინოდის სხდომაზე პროცედურულ საკითხებზე იმსჯელეს, მათ შორის, სად სჯობს, ჩატარდეს გაფართოებული კრება.
„გაფართოებულ კრებაზე, დაახლოებით 2 000 კაცს ველოდებით. ყველა ეპარქიიდან წარმოდგენილი იქნებიან, ოღონდ არა ხმის უფლებით, არამედ სათათბირო ხმის უფლებით. უფრო საჯაროობისთვის არის ეს. ჩვენ შეიძლება მოვისმინოთ - ჯერ წინასწარ ვერავინ იტყვის, ამ გაფართოებულ კრებაზე ვიღაცის მოხსენება, ისეთი, რომელმაც შეიძლება სინოდის წევრების გადაწყვეტილებაზე მოახდინოს გავლენა“, - განაცხადა მიტროპოლიტმა.
საქართველოს საპატრიარქოს საზოგადოებასთან ურთიერთობის სამსახური წმინდა სინოდის სხდომის ოქმს აქვეყნებს, რომელსაც უცვლელდ გთავაზობთ.
| სარეკლამო ადგილი - 11 650 x 60 |
