54
07 აპრილი 2026, 17:36
რუსული ნავთობის მარკა Urals-ის ფასი, ბალტიის პორტ პრიმორსკში დატვირთვისას, 2 აპრილის მდგომარეობით 116.05 დოლარს შეადგენდა ერთ ბარელზე, იტყობინება Bloomberg, Argus Media-ს მონაცემებზე დაყრდნობით.
ეს არის ნავთობის მაქსიმალური ფასი 2013 წლის შემდეგ, როდესაც ბარელი 113–115 დოლარი ღირდა, რაც Bloomberg-ის ინფოგრაფიკაშიც ჩანს.
Argus Media-ს მონაცემებით, შავი ზღვის პორტ ნოვოროსიისკში დატვირთვისას ფასი 114.45 დოლარამდე გაიზარდა ერთ ბარელზე.
ეს თითქმის ორჯერ აღემატება იმ საშუალო ფასს - 59 დოლარს ბარელზე, რაც რუსეთის ბიუჯეტში იყო გათვალისწინებული მიმდინარე წლისთვის.
რუსული ნავთობის ფასები გაიზარდა აშშ-ისა და ისრაელის მიერ ირანის წინააღმდეგ მიმდინარე ომის ფონზე და ჰორმუზის სრუტის დახურვის გამო, რომლის გავლითაც მსოფლიო ნავთობის მიწოდების დაახლოებით მეხუთედი გადის.
ამასთან, უკრაინა რუსეთის წინააღმდეგ ომის ფარგლებში ბოლო კვირებში აქტიურად უტევს რუსულ ნავთობინფრასტრუქტურას, ცდილობს ხელი შეუშალოს მოსკოვს, რომ ახლო აღმოსავლეთის კრიზისიდან ეკონომიკური სარგებელი მიიღოს.
| სარეკლამო ადგილი - 11 650 x 60 |
