არჩევნების დასრულების შემდეგ გადაწყვიტეს ხელისუფლების არაღიარების პოლიტიკას მიჰყოლოდნენ, თითქოს არჩევნები გაყალბდა და ა.შ., მაგრამ ვფიქრობ თვითონაც გარკვეულწილად ჩიხში არიან, - განაცხადა გადაცემაში „იმედი LIVE“ საქართველოს პარლამენტის თავმჯდომარის მოადგილემ, გიორგი კახიანმა.
დეპუტატს კითხვა დაუსვეს გერმანიის საგარეო საქმეთა სამინისტროს ვებგვერდზე საქართველოს მთავრობის შესახებ განთავსებული მოძველებულ ინფორმაციაზე.
„როგორ შეიძლება ამაზე სერიოზულად ვისაუბროთ, რომ [გერმანიის] საგარეო საქმეთა ვებგვერდზე ამდენი ხნის განმავლობაში ვერ მოხერხდა ორი სახელისა და გვარის ჩასწორება. მეორეს მხრივ, ეს ბევრის მთქმელია და წარმოაჩენს იმ უსამართლო დამოკიდებულებას, რაზეც აქამდე ვსაუბრობდით. არჩევნების დასრულების შემდეგ გადაწყვიტეს ხელისუფლების არაღიარების პოლიტიკას მიჰყოლოდნენ, თითქოს არჩევნები გაყალბდა და ა.შ., მაგრამ ვფიქრობ თვითონაც გარკვეულწილად ჩიხში არიან.
წელიწადზე მეტი გავიდა, რაც საქართველოს ლეგიტიმური ხელისუფლება ჰყავს და რაღაცნაირად უნდა შეცვალონ თავიანთი დამოკიდებულება, რადგან არასერიოზულ მდგომარეობაში აყენებენ თავიანთ თავებს. სახელმწიფოში ელჩი გყავს და საგარეო საქმეთა სამინისტროს ვებგვერდზე ორი სახელისა და გვარის შეცვლას ვერ ახერხებ, არასერიოზულია“, - აღნიშნა კახიანმა.
ცნობისთვის, გერმანიის საგარეო საქმეთა სამინისტროში გაგზავნილია საქართველოს ნოტა. საქმე ეხება ოფიციალური მონაცემების განახლებას. გერმანიის საგარეო საქმეთა სამინისტროს ვებგვერდზე, საქართველოს პრეზიდენტად ისევ მითითებულია სალომე ზურაბიშვილი, საგარეო საქმეთა მინისტრად კი - ილია დარჩიაშვილი. ოფიციალური წერილის მიუხედავად მონაცემები ამ დრომდე განახლებული არ არის, ეს მაშინ, როცა გერმანიას იგივე მიდგომა არ აქვს მაგალითად, რუსეთისა და სირიის შემთხვევაში.
| სარეკლამო ადგილი - 11 650 x 60 |
