ფაქტია, რომ ჩვენ საქმე გვაქვს სპეცსამსახურების სახელმძღვანელოს მიხედვით ჯგუფების მომზადებასთან იმისთვის, რომ ქვეყანა არიონ და ამას სჭირდება შესაბამისი რეაგირება, - განაცხადა საქართველოს პარლამენტის თავმჯდომარემ შალვა პაპუაშვილმა.

იგი ამგვარად გამოეხმაურა ინფორმაციას, რომ ქართულ ოპოზიციას „პრაღის სამოქალაქო საზოგადოების ცენტრის“ ერთ-ერთი ლიდერი, იგორ ბლაჟევიჩი უწერს.

„ის, რაც ადრე კეთდებოდა ამერიკის წინა ადმინისტრაციის დაფინანსებით, მათ შორის საქართველოში აკერმანის და სხვა მსგავსი ინსტრუქტორების მონაწილეობით, უკვე რამდენიმე ხანია, რაც ამგვარი მავნე პრაქტიკა ახალმა ადმინისტრაციამ სრულად შეაჩერა, გადასული არის ევროკავშირში. ფაქტია, რომ ჩვენ საქმე გვაქვს სპეცსამსახურების სახელმძღვანელოს მიხედვით ჯგუფების მომზადებასთან იმისთვის, რომ ქვეყანა არიონ და ამას სჭირდება შესაბამისი რეაგირება. დარწმუნებული ვარ, როგორც სხვა შემთხვევებში, სახელმწიფო უსაფრთხოების სამსახური ძალიან დეტალურად დააკვირდება და გამოავლენს, რასთან გვაქვს საქმე.

ფაქტია, რომ ქართული პასპორტის მქონე, სახელით და გვარით ქართველები მონაწილეობენ სპეცსამსახურების სცენარით მიმდინარე პროცესებში. მე რაც ვნახე, ის ორგანიზაცია, რომელსაც ეს ბატონი [ბლაჟევიჩი] წარმოადგენს, ფინანსდება ევროპული ფონდებიდან. მათ შორის, ღია წყაროებით რაც ჩანს, მილიონობით დაფინანსებას გასცემს, კონცენტრირებული არის, ორიენტირებულია და სპეციფიკურად უყურებს კავკასიის რეგიონს, აღმოსავლეთ ევროპას და ჩანს, რომ არის მავნე მიზნები და განზრახვები. იკვეთება პირდაპირ სპეცსამსახურების ხელი იმისთვის, რომ სხვა ქვეყანაში არიონ სიტუაცია. მართლაც სირცხვილია, თუ სადამდე მიდის ევროპული ფონდების დაფინანსების ანტიდემოკრატიული ტენდენციები”, - განაცხადა პარლამენტის თავმჯდომარემ.

„ქრონიკის“ ინფორმაციით, ოპოზიციას რევოლუციურ სცენარს ამჯერად „პრაღის სამოქალაქო საზოგადოების ცენტრის“ ერთ-ერთი ლიდერი, იგორ ბლაჟევიჩი უწერს.