ჩვენ ვგულშემატკივრობთ ამ [უკრაინა-რუსეთის] ომის დასრულებას, ვინაიდან ყოველი დღე ამ ომისა, ნიშნავს დამატებით ტანჯვას უკრაინელი ხალხისთვის, - განუცხადა ჟურნალისტებს პარლამენტის თავმჯდომარემ შალვა პაპუაშვილმა.
ჟურნალისტმა მას კითხვა დაუსვა პუტინისადმი ზელენსკის ღია წერილზე, სადაც ის პუტინს ომის დასრულებისა და ლიდერების დონეზე პირდაპირ მოლაპარაკებებზე გადასვლისკენ მოუწოდებს.
„არ მგონია ჩვენი შესაფასებელი იყოს [წერილი]. ჩვენ ვგულშემატკივრობთ ამ [უკრაინა-რუსეთის] ომის დასრულებას, ვინაიდან ყოველი დღე ამ ომისა, ნიშნავს დამატებით ტანჯვას უკრაინელი ხალხისთვის. პირველივე დღიდან ვამბობდით, რომ ნებისმიერი შესაძლებლობა უნდა ყოფილიყო გამოყენებული მშვიდობის დასამყარებლად. სამწუხაროდ, ასეთ მიდგომებს ვერ ვხედავთ ზოგიერთი ევროპული ქვეყნის მხრიდან. ვხედავთ, როგორ აქეზებენ ამ კონფლიქტის გაგრძელებას. შეგახსენებთ ყველას, რომ ამ ომის დაწყებიდან 2 თვეში, 2022 წლის აპრილში, სტამბოლში პარაფირებული იქნა სამშვიდობო შეთანხმება, უკრაინული და რუსული დელეგაციების ხელმძღვანელების მხრიდან.
უკრაინის დელეგაციას ხელმძღვანელობდა დავით არახამია და მისი განცხადებაა, რომ უკრაინისთვის მისაღები პირობები იყო. დაბრუნდნენ კიევში, იქ ჩავიდა ბრიტანეთის პრემიერ-მინისტრი და ჩაშალა შეთანხმება. ამის შემდეგ უკრაინა ომობს უკვე ოთხი წელია და ბრიტანეთის ყოფილი პრემიერ-მინისტრი ბორის ჯონსონი მშვიდად დადის და კონფერენციებსა და სემინარებს ატარებს. ეს არის უპასუხისმგებლო დამოკიდებულება სხვა ქვეყნის ბედის მიმართ, რომელიც სამწუხაროდ, ომამდეც გამოიჩინეს დასავლურმა ქვეყნებმა. ამ ომის თავიდან აცილება შეიძლებოდა, ამას ადასტურებს აშშ-ის ადმინისტრაცია და ვერ შეძლო ეს ევროკავშირმა, ნატო-მ, მაშინდელმა დასავლურმა სამყარომ. ამ ომის დასრულება შეიძლებოდა თავშივე. ამას ადასტურებს უკრაინის ხელისუფლება. ნებისმიერი ინიციატივა, რომ ომი დასრულდეს, მნიშვნელოვანია და მნიშვნელოვანია, რომ მეტ-ნაკლებად მისაღები პირობები იყოს“, - აღნიშნა პაპუაშვილმა.
| სარეკლამო ადგილი - 11 650 x 60 |
