ევროკავშირის ხუთი ქვეყანა გამოდის ინიციატივით, ბლოკმა ახალი წევრები მიიღოს ისე, რომ მათ დროებით გარკვეული უფლებები შეზღუდული ჰქონდეთ. ინფორმაციას Reuters-ი ავრცელებს.
სააგენტოს ცნობით, გერმანიამ, საფრანგეთმა, ნიდერლანდებმა, ბელგიამ და ლუქსემბურგმა საერთო დოკუმენტი შეიმუშავეს, რომლის თანახმადაც, ქვეყნები ევროკავშირში ისე გაწევრიანდებიან, რომ გარკვეული დროის განმავლობაში მათ უფლებები შეზღუდული ექნებათ, რაც სამართლის უზენაესობის დამატებითი გარანტია უნდა გახდეს.
როგორც Reuters-ი იუწყება, ევროპის ქვეყნების მთავრობები დღემდე აწარმოებენ დისკუსიას იმის თაობაზე, ღირს, თუ არა ახალი წევრებისთვის ახალი წესების შემოღება. ზოგი სახელმწიფო ბრიუსელს სთავაზობს შეიმუშაოს უფრო მკაცრი პირობები, რათა ვიქტორ ორბანის დროინდელი უნგრეთის მსგავსი მაგალითი არ განმეორდეს.
ახალი დოკუმენტი რამდენიმე ვარიანტს მოიცავს, მათ შორის მონიტორინგისა და პირობების ახალი მექანიზმის შექმნას, რომელიც ბრიუსელს უფლებას მისცემს გარკვეულ ზომებს მიმართოს, თუ დაინახავს, რომ ახალი წევრი სახელმწიფო დემოკრატიის ან მედიის თავისუფლების კუთხით სერიოზულ უკუსვლას განიცდის.
| სარეკლამო ადგილი - 11 650 x 60 |
