78
17 ივნისი 2026, 15:33
ანალიტიკოსი ნიკოლოზ მეტრეველი ევროპარლამენტარ რასა იუკნევიჩიენეს განცხადებას ეხმაურება და აცხადებს, რომ აღნიშნული შეფასება ევროკავშირის მხრიდან საქართველოსადმი წლების განმავლობაში გაკეთებულ გზავნილებთან წინააღმდეგობაში მოდის.
მისი თქმით, თუ მართლაც ასე იყო, რომ რუსეთ-უკრაინის ომამდე საქართველოს ევროკავშირში გაწევრიანების პერსპექტივაზე რეალური საუბარი არ მიმდინარეობდა, მაშინ რას ემსახურებოდა საქართველოს ევროპულ მომავალთან დაკავშირებული არაერთი განცხადება, ასევე ასოცირების შეთანხმება, თავისუფალი ვაჭრობის რეჟიმი და უვიზო მიმოსვლა.
„ ევროპარლამენტარ რასა იუკნევიჩიანეს ყოვლად გამაოგნებელი განცხადება, რომ რუსეთ-უკრაინის საქართველოს ევროკავშირის გაფართოებაზე რეალურად არავინ საუბრობდა, სერიოზულ კითხვებს აჩენს.
თუ ეს მართლაც ასე იყო, მაშინ რას ნიშნავდა საქართველოსთვის წლების განმავლობაში გაკეთებული განცხადებები ევროპული მომავლის შესახებ? რას ნიშნავდა ასოცირების შეთანხმება, თავისუფალი ვაჭრობა, უვიზო რეჟიმი და მუდმივი გზავნილები, რომ საქართველო ევროპული ოჯახის ნაწილია?
გამოდის, რომ 2022 წლამდე საქართველოს საზოგადოებას ან არასრული ინფორმაცია მიეწოდებოდა, ან ევროპული პერსპექტივა მხოლოდ პოლიტიკური რიტორიკა იყო. ასევე გაუგებარია, რატომ გახდა სწორედ რუსეთ-უკრაინის ომი ევროკავშირის გაფართოების მთავარი კატალიზატორი. ევროკავშირი სამხედრო ალიანსი არ არის, ის პოლიტიკური და ეკონომიკური გაერთიანებაა, რომლის საფუძველი დემოკრატია, კანონის უზენაესობა და რეფორმებია. აქედან გამომდინარე: თუ წევრობა ამ კრიტერიუმებზეა დამოკიდებული, რატომ აღმოჩნდა ომი გადამწყვეტი ფაქტორი?
თუ ომმა მხოლოდ დააჩქარა უკვე არსებული პროცესი, ეს გასაგებია. მაგრამ იმის თქმა, რომ მანამდე გაფართოებაზე საუბარი საერთოდ არ არსებობდა, ეწინააღმდეგება იმ გზავნილებს, რომლებსაც ევროკავშირის წარმომადგენლები წლების განმავლობაში საქართველოს საზოგადოებას აწვდიდნენ.
და ბოლოს, ჩნდება ფუნდამენტური კითხვა: საერთოდ გვინდა კი ისეთ ევროკავშირში გაწევრიანება, სადაც თავადვე აღიარებენ, რომ გადაწყვეტილებებს არა ღირებულებები და რეფორმები, არამედ მხოლოდ ბრიუსელის ბიუროკრატიის ინტერესები განსაზღვრავს…“ - წერს მეტრეველი.
| სარეკლამო ადგილი - 11 650 x 60 |
